Inhlanganiso ebona ngokuqutshwa kokhetho olukhululekileyo, iZimbabwe Elections Support Network, iZESN, ithi uhelo lokwaba izigaba zokuvota, idelimitation, alwenziwanga ngemfanelo Kumbiko eyethule lamuhla kulandela ukugqitshwa kohlelo lwedelimitation. Inhlanganiso ebona ngokuqutshwa kokhetho elizweni, iZimbabwe Electoral Commission, ZEC, yethule imbiko etshengisa ukuthi izigaba ezinengi zisemaphandleni lapho iZanu PF eyaziwa ilosekelo khona.
IZESN ithi njalo ekuhlolisiseni ekwenzileyo ezigabeni ezitshiyeneyo zelizwe akukabi lokukhankasa okusobala lanxa iziphathamandla zeZanu PF eziqalisile ukwethusela abasekeli beMDC. Phansi kwenguquko yengxenye yemithetho yezokhetho uhlelo lwedelimitation belumele lwenziwe yinhlanganiso ezimeleyo hatshi iZEC.
Lanxa limthetho yahlaziywa yethulwa ngamadale ephalamende lesenate uMongameli Mugabe owaya kukhefu phetsheya, eFar East, kakafaki isandla sakhe ukuze limthetho isebenze. IZESN ithi iZanu PF isiqalisile ukusebenzisa inotho yelizwe ukukhankasela uMongameli Mugabe njengalokhu okwenziwa ngohlelo lokutshengisela, imillion man march. UChris Gande weStudio 7 uxoxe lengcwethi kwezesisekelo sombuso njalo eyisiphathamandla semdc ekhokhelwa nguMnu. Morgan Tsvangirai, uMnu. Felix Magalela Mafa ukuze sizwe imbono yakhe.