amalinks wokungena

Breaking News

Inhlanganiso Yabatsha Isola amazwi KaJudge President WeHigh Court


Inhlanganiso yabasakhulayo kuleli eye Youth Forum ithi iyadana kakhulu ngamanyathelo abehluli kuleli okukhuthaza uzulu ukuba amukele impumela yokhetho oluzayo isithi isisekela inyathelo lebandla eliphikisayo lokuba kube lokutshengisela ngokuthula kuleli ngenhloso yokuthi kwethulwe isisekelo sombuso esitsha ukhetho lungakenziwa.

Umkhokheli wenhlanganiuso yabatsha le uMnumzana Wellington Zindove uthi noma inhlanganiso yakhe ihlonipha ugatsha lwezemithetho kuleli ilokudana okukhulu ngamazwi omkhokheli wabomahluli be dale le High Court u Judge President Rita Makarau okuthi kumele uzulu we Zimbabwe amukele impumela yokhetho.

Uthe e Zimbabwe kulodubo lokuba abantu abanengi abaselathemba ekuqutshweni kokhetho kakuhle kungela kuqilibezela ethi sikhuluma kanje idale lokhe lihleli phezu kodaba lwesicelo sebandla eliphikisayo ele MDC esokuthi laqilibezelwa kukhetho lokudinga umongameli welizwe ngomnyaka ka 2002 I Youth Forum ithi abe mithethwandaba bekumele basebenze bezimele njalo behlolisisa onke amacala lezicelo ezilethwa phambi kwabo bezihluza lokukhipha izigwebo zabo kusaselesikhathi kulokukhuluma ngokuphezu kwezombangazwe bona befinyelela emsebenzini wabo omayelana laloludaba.

Ithi okwamanje kulomkhuba omubi emazweni awezwekazi le Africa owokutshontshelana lokuqilibezela kukhetho isithi lokhu kucina kubangela udlakela; UMnumzana Zindove uthe inhlanganiso yakhe ifisa ukubona ukhetho oluzayo lusenziwa ngaphansi kwesisekelo sombuso esitsha ethi yiyo yodwa indlela engenza ukuba udaba lokuqilibezela lwehliswe kukhetho oluzayo.

Uthe ngalokho inhlanganiso yakhe isekela ngokugcweleyo inyathelo lebandla eliphikisayo ele MDC elokuthi kube lokutshengisela ngokuthula kukhuthazwa ukuvezwa kwesisekelo sombuso esitsha kungakenziwa ukhetho kuleli. Uthe kumele impumela yokhetho oluzayo ibe ngeyamukelekayo ngabantu bonke njalo kungekho ozakuthi iyasoleka ukuze ele Zimbabwe libe kusimo esihle kungela kuqabana lokusolana.

Unobhala jikelele welinye lamacele e MDC uMnumzana Tendai Biti utshele umhlangano we rally e Harare ngoMqibelo ukuba ibandla lakhe selizasungula ukutshengisela ngokuthula ezitaladeni likhuthaza ukuba kwethulwe isisekelo sombuso esitsha abantu bengakangeni kukhetho oluzayo kuleli.

Ezinye Indaba ngesi Ndebele...

XS
SM
MD
LG