Ikomisheni ebona ngezokhetho, iZimbabwe Election Commission izolo yethule impumela yohlelo lwayo lokwehlukanisa izabelo zokhetho, idelimitation, kuMongameli Robert Mugabe ledale lephalamende. Uhlelo lolu luveze ukuthi kulabantu abedlula izigidi ezinhlanu, 5 million, abakuluhlu lwabazavota.
Esethula imbiko yalikhomisheni, uphathintambo wezemithetho, uMnu. Patrick Chinamasa uthi likhomisheni ihlangene lenhlupho ezinengi ekufezeni loluhlelo olugoqela ukusilela kwamafutha ezimota, imali yokubhadala izisebenzi lokunye okunjengokuswela imitshina yamakhomputa. Yengezelele ngokuthi bonke abangasuthiseki ngohlelo lolu balako ukuletha izikhalazo zabo kukhomisheni le.
Kodwa amabandla aphikisayo ahle azisa loluhlelo lungakapheli ukuthi kayisoze ilwamukele ngoba lwenziwe yikhomisheni emele idilizwe phansi kwezivumelwano zenkulumo ezicazululwa nguMongameli Thabo Mbeki wele South Africa. Ingcwethi kwezesisekelo sombuso welizwe njalo eyisikhulumi seMDC koBulawayo, uMnu. Felix Magalela Mafa utshele iStudio 7 ukuthi loluhlelo lwenziwa ngendlela yokuthi iZanu PF ingqobe.