Izizalwane zeZimbabwe ezihlala kwamanye amazwe lazo sezimanyene lamabandla aphikisayo, inhlangangiso ezizimeleyo, uhulumende weMelika, labanye ekuchothozeni uMongameli Robert mugabe ngokubeka ilanga lokhetho elifunwa nguye, kungakalotshelwana isivumelwano sokuthi ukhetho luzaqhutshwa ngendlela ekhululekileyo.
Izizalwane zeZimbabwe ezihlala kwamanye amazwe sezikhuthazana ukuthi kusukela khathesi kuze kuyefika lolokhetho mhlaka 29 March zingathumezeli imali zisebenzisa i Western Union, ngoba ibandla le ZANU PF lilakho ukusebenzisa limali ekhethweni. UMnumzana Bafana Moyo ohlala kwele Ireland utshele u Brenda Moyo weStudio7 ukuthi usekela lumbono kakhulu.
Siphinde sakhuluma lengcwethi ecubungula ezombusazwe uMnumzana Bekithemba Mhlanga othi laloba amabandla aphikisayo elomkhankaso omkhulu wokuthi izizalwane zeZimbabwe ezihlala kwamanye amazwe zithole ithuba lokuvota, lokhu akusoze kwenzakale. UMhlanga uthi zikhona ezinye indlela izizalwane zeZimbabwe ezingatshengisa ukukhonona kwazo ngokwenziwa nguMongameli Robert Mugabe, esekela umbono kaMnumzana Moyo