Ibandla leZanu PF selixotshe owayengumphathintambo wezenotho, uMnu. Simba Makoni ngokungena kukhetho lokudinga uMongameli. Phansi kwesisekelo sombuso webandla leZanu PF uMakoni usewazixotsha ngoba efune ukuncintisa isikhundla sokubanguMongameli lona ibandla selakhetha uMongameli Mugabe ukuthi alimele.
Kubikwa uMongameli Mugabe ehle wadlulisela phambili umhlangano wedale elimqoka, iPolitburo kade umele wenziwe lamuhla ngoba izanuse zakhe zeCIO sezidinga abalobudlelwano loMakoni. Amaphephandaba azimeleyo athi abasekela umakoni bagoqela owayekhokhela ibutho uMnu. Solomon Mujuru, umka msekeli kaMongameli Mugabe, uJoyce. Umsekeli wenhlanganiso yabalwa impi yenkululeko, uMnu. Joseph Chinotimba ubikwa ethembise ukuthi amalunga enhlanganiso yakhe azathathela uMakoni labasekeli bakhe amanyethelo angawavezanga.
Kodwa omunye wabasekeli bakaMakoni, owayengowebutho, uretired Major Kudzai Mbudzi, utshele intathelizindaba izolo ukuthi vele amapholisa ensitha, amaCIO, angalokothi ahlasele uMakoni ngoba labo besazi imisebenzi yamaCIO. Kunjalo nje, kubikwa kuyisiphithiphithi abantu sebesiyahlola amagama abo ngemva kokwethulwa kwembiko kamakoni yokuthi uzangena kukhetho. Kodwa ingcwethi ecubungula ezombusazwe, uMnu. Dumaphi Mema uthi lanxa uMakoni engathola amavoti angedlula abazancintisa abafama lomnu. Morgan tsvangirai kasoze enelise ukuncinta uMongameli Mugabe.