Olungaba ludaba oluhle kwabanengi elizweni, olungabe ludanise abanye njalo, icele le MDC elikhokhelwa nguMnumzana Arthur Mutambara lithi selizasebenzelana loMnumzana Simba Makoni kukhetho oluzayo.
Kodwa umsekeli kaMongameli walelibandla, uMnumzana Gibson Sibanda utshele iStudio 7 ukuthi okunengi ngomanyano wabo lo kuzavezwa kusasa.
UMutambara loMakoni bakhangelelwe ukuba lomhlangano lentathelizindaba edolobheni leHarare. USibanda uthi ibandla lakhe aliqakathekisi kumbe ukukhangela izifiso zomuntu oyedwa, kodwa liqakathekisa ukukhulula imuli yeZimbabwe endubekweni ezibhekane lelizwe.
Kusasa lilanga lapho idale lokwamukela amagama abazancintisa kukhetho, iNomination Court ezahlala khona kuzigaba zelizwe. Isiphathamandla seZimbabwe Electoral Commission iZEC, uMnumzana Shupikai Mashereni wethule umbiko wokuthi iNomination Court yabafuna ukuncintisa kukhetho lukaMongameli izahlala e Mashonganyika Building e Harare.
Idale labafuna ukuncintisa izikhundla zokungena edale lePalamende lele Senate lihlala kumaProvinces. Abafuna ukuncintisa kukhetho lwamakhansila bamele baye emahofisini kaManisipala ezigabeni zabo. INomination Court ivula ngo 10 ekuseni ivale ngo 4 emini.
Kunjalo nje icele leli lithi laloba umsebenzi ubungelula kuma primary elections seliwufezile ngendlela esuthise abanengi. liyavuma ukuthi indubeko bezikhona lapha lalapho ngoba umncintiswano ubumkhulu kulabo abafuna ukuncintisa kukhetho lwamakhansila, amalunga edale lepalamende, lawe senate.
U Brenda Moyo weStudio 7 uphinde wakhuluma lomqoqi webandla, uMnumzana Esaph Mdlongwa ochasisa ngamalungiselelo ebandla lakhe lokusa amaphepha alabo abazancintisa kukhetho, kudale leNomination Court.