amalinks wokungena

Breaking News

Abazancintisa Kukhetho Babhalisa Amabizo Abo Emthethwandaba WeNomination Court


Abazancintisa kukhetho luka 29 Mbimbitho esigabeni zonke zelizwe lamuhla bavukele ukuyabhalisa amabizo abo kumithethwandaba yeNomination Courts endaweni ezitshiyeneyo. Intathelizindaba yeStudio 7 uThabang Mathebula obekoBulawayo uthi bekulenxgxabanxoza kulelidolobho abantu abanengi bebhalisa ukumela ibandla linye kusigaba esifanayo.

Umthethwandaba lo ubikwa ubuyale ukwamukela amaphepha kaMnu Eddie Cross owecele leMDC elikhoikhelwa nguMnu Morgan Tsvangirai wacina ekhweza udaba lwakhe emthethwandaba weHigh Court.

EHarare intathelizindaba yethu uMark Nthambe uthi umkhokheli welinye lamacele eMDC uMnu Arthur Mutambara utshele intathelizindaba ukuthi kasoze ebe esancintisa kukhetho lokudinga umongameli ngoba sezasekela uMnu Simba Makoni.

Ngalokhu uthi sezancintisa kukhetho lokudinga ilunga ledale lephalamende eZengeza West. Abazancintisa kukhetho lukamongameli nguMnu Tsvangirai, Umnu Makoni kanye lomongameli Robert Mugabe. Bonke bahambise amaphepha abo lamuhla eHarare. Omunye ozancintisa kusikhundla sikamongameli nguMnu William Gwata owebandla leChristian Democratic party.

Enkabazwe uChrisa Gande ubika ukuthi kubelengxabanxoza enkulu ngemva kokuba kube leziphathamandla ezitshiyeneyop ezikucele leMDC kaTsvangirai ezihambise amabizo alabo abazancintisa bemele ibandla atshiyeneyo. Abanye babikwa bengabecele lalelicele elikhokhelwa nguMnu Patric Kombayi kuthi abanye ngamecele elikhokhelwa nguMnu Obert Sibanda.

Kunjalo nje ingchwethi ecubungula ezombusazwe uMnu Bekithemba Mhlanga uthi usekelo uMnu Makoni aseluthole kucele leMDC elikhokhelwa nguMnu Mutambara lumupha idlabuzane lokukhankasa eqinile.

UMhlanga utshele uNtungamili Nkomo weStudio 7 ukuthi ukubakhona kukaMakoni kupha icele likaMutambara ithuba lokunqoba kwezinye indawo lapho ebelingasoze linqobe khona, lapho uMakoni alosekelo khona.

Ezinye Indaba ZeStudio 7...

XS
SM
MD
LG