Odokotela bathi sebekhalele umsebenzi befuna ukwengezelelwa iholo, bethole I US$3000 ngenyanga.
Umsekeli ka mgcinisihlalo we nhlanganiso ye Hospitals’ Doctors Association, uDokotela Richard Manyara, utshele istudio 7 ukuthi inhlanganiso yakhe ifuna uDokotela athole i US$3000 ngenyanga kuthi nxa ingeyamadola eZimbabwe, ayithole ngesilinganiso somkambo omnyama wayonaleyo nyanga kumbe ngesilinganiso esabekwa ngumanyano we United Nations esiphansi kancane lesomkambo omnyama. Uthi lokhu bakwenzela ukuthi imali abangaye ngezelelwa ingaginywa yikuwa kwamandla emali yakuleli, i inflation. UManyara uthi odokotela, bavele kabayi lemsebenzini ngoba lokhu belindele uhulumende ukuthi alalele izikhalazo zabo. Abongi labo babikwa bekhalele umsebenzi.
Kunjalo nje, ababalisi bathi baqhubekela phambili ngokukhalala umsebenzi uhulumende aze alalele izikhalazo zabo. Isiphathamandla senhlanganiso ye Progressive Teachers Union of Zimbabwe, uMnu. Vusumuzi Mahlangu, utshele uSithandekile Mhlanga we studio 7 ukuthi ezikolo kutshaya ibhungwane ngoba abantwana kabasalugxobi.