Uhulumende usengezelele izisebenzi zakhe iholo. Lanxa kungakazakali ukuthi iholo leli lengezwe ngesilinganiso esinganani iStudio 7 ithole imbiko ethi umbalisi onguye oleholo eliphansi usezathola i $3, 9 billion, kuthi oleliphezulu athole i $5, 7 billion. UMnu. Raymond Majongwe, umkhokheli wenhlanganiso ye Progressive Teachers’ Union of Zimbabwe, PTUZ utshele iStudio 7 ukuthi loba nje kusobala ukuthi leli liqhinga lika Mongameli Robert Mugabe lokudinga amavoti, ababalisi bayathokoza ngenyathela leli, ngoba bona bebekhalaze, i $1, 7 billion ngenyanga, ephansi kakhulu kulaleyo abayiphiweyo.
Lokhu kulandela amazwi kaMongamli Mugabe emhlanganweni e Somvubu eNyathi izolo, lapho abikwe esithi yena ngokwakhe usayine ugwalo olukhomba ukuthi ababalisi bazangezelelwa iholo. UMnu. Enock Paradzai, isiphathamandla se nhlanganiso ye PTUZ, uthi inhlanganiso yakhe ikhuthaza ababalisi ukuthi bebuyele emsebenzini kusasa kodwa labo abangelamali yokugada bengahlukuluzwa, baze bazuze iholo labo kuviki ezayo.