amalinks wokungena

Breaking News

Kubhonjwa Indlu Yomuntu Oncintisayo Ngelanga Lokhetho KoBulawayo


Icele leMDC elikhokhelwa nguMnu. Morgan Tsvangirai lithi lizazisa impumela yokhetho nxa liyithola okutsho ukuthi kalisoze lilalele inkuthazo yamapholisa yokuthi iZESN yiyo yodwa elelungelo lokukhipha impumela yokhetho.

Lelicele lithi lizenza umhlangano lethathelizindaba ngehola lakula, 1a.m. lapho elizazisa ngempumela yokhetho eyabe isitholakele ngaleso sikhathi. Kunjalo nje, eVictoria Falls lase Mutare kubikwa amaphepha okuvota ephelile abantu bamelela okwamahola amanengi besemzileni.

Kubikwa abanye kade bemele bamele abancintisayo, amapolling agents, bancitshwe imvumo yolwenza lumsebenzi. EKadoma abantu abanengi baikwa behluleke ukuvota ngoba amagama abo engekho kuluhlu lwabalelungelo lokuvota. EBikita kubikwa abavotisayo besuke bebaleka ngemva kokuba amapholisa omvikela engene ngocuku kweneye indawo yokuvotela.

EInsiza West kubikwa kufe umuntu ngemva kokuba imota kade itshayelwa ngoncintisa edinga ukumela lesi sigaba edaleni lephalamende, uMnu. Qhubani Moyo, iphume emgwaqweni yatshalumuntu. UMoyo labanye kade besemoteni le babikwa belimele kakhulu. Inhlanganiso yeCrisis in Zimbabwe Coalition ithi kulomuntu ofileyo ngemva kokutshaywa. Akwazakali ukuthi lumuntu ngowebandla liphi.

Omunye wabancintisa kukhetho edinga ukuba ngumongameli, uMnu. Simba Makoni ubikwa ehluleke ukuvota ngemva kokuthola igama lakhe lingekho kuluhlu labalelungelo lokuvota. Kodwa uMakoni ucine esevota ngemva kwamahola amane sekulungisiswe loludaba yiziphathamandla zeZEC. Kodwa ngemva kokuvota uMakoni utshele iStudio 7 ukuthi ulethemba lokungqoba. UMongameli Mugabe loMnu. Morgan Tsvangirai okhokhela elinye icele leMDC bavote kungela dubo.

UMongameli Mugabe utshele intathelizindaba eqeda ukuvota ukuthi engaqotshwa uzasuka esikhundleni njalo kasoze avumele ukuqilibezela. UTsvangirai laye uthi ulethemba lokuthi uzangqoba. Ingcwethi ecubungula ezombusazwe uMnumzana Rejoice Ngwenya wethekelele indawo zemaphandleni ezimbalwa ezigqagqele idolobho leharare, ezigoqela i ruwa, domboshawa, juru, marondera lezinye. UNgwenya uchasisa akubone kusenzakala endaweni zokuvotela.

Ukuvota endaweni ezinengi zelizwe kuqhutshwe ngokuthula lamuhla. Kulembiko ethi bekulendwendwe ezinde emadolobheni, kodwa emaphandleni kubikwa bezingekho laloba abantu bevote ngobunengi. Intatheli yethu uThabang Mathebula obeseSigodini ubika ukuthi ukuvota kuhambe kuhle sibili kulesisigaba. Uthi njalo amapholisa kanye lamasotsha, akade ebonakala ndawana yonke ehlomile phambilini kokhetho, ebengekho lamuhla.

Ezinye izindaba zeStudio 7 ...

XS
SM
MD
LG