Icele leMDC elikhokhelwa nguMnu. Morgan Tsvangirai lithi kusobala ukuthi umongameli walelicele nguye osengqobile kulolukhetho.
Esethula imbiko yempumela yokhetho unobhala jikelele walelicele, uMnu. Tendai Biti uthe ibandla leli lingqobe kuzabelo ezinengi zelizwe ezigoqela emaphandleni lapho okwandise ukungqoba khona iZanu PF. UMnu. Biti usole imbiko eyethulwe liqula labahlola ukhetho elesadc elithe ukhetho lwaqutshwa ngemfanelo kungela kuqilibezelwa.
UBiti uthe kuyamangalisa ukuthi iqula leli lingatsho njalo lona lelibandla lasa indaba eziphathelane lokungaqutshwa kuhle kokhetho emthethwandaba okugoqela uluhlu lwamagama abavotayo. Kunjalo nje, amapholisa abikwa edinga amalunga ecele leMDC kaTsvangirai abazisa abantu ngempumela yokhetho. Isiphathamandla salelicele, uMnu. Sam Sipepa Nkomo utshele uChris Gande weStudio seven ukuthi ibandla labo lizathatha inyathelo nxa ibandla leZanu PF lingazama ukuqilibezela.
Owancintisa kukhetho olusanda kwedlula ezimele, uMnu. Simba Makoni ulakho ukusungula ibandla nxa kuyikuthi uyabe engqotshiwe. UChris Gande weStudio 7 uxoxe lesiphathamandla somkhankaso kamakoni koBulawayo, uMnu. Max Mkandla ukuze sizwe okunengi ngaloludaba.