amalinks wokungena

Breaking News

Kwethulwa IBearer Cheque Ebiza I$50million


Ibhanga elikhulu lelizwe ele Reserve Bank of Zimbabwe selethule ama Bearer Cheques amatsha awe $ 25 million le $ 50 million ngesikhathi ukuwa kwamandla emali yakuleli sekuqonge kwadlula isilinganiso se 164 000 ekhulwini. Kukanti lelibhanga libelithembise ukuthi lizakhweza isilinganiso semali engathathwa ngumuntu ngelanga ebhanga sisuka ku Z$ 500 million sisiya kuZ$ 5 billion selehlulekile kulokho ngoba livumele ukuthi umuntu atholiswe i Z$ i billion kuphela ngelanga.

Ukuza kwemali entsha kulandela ukulethwa kwamanye njalo amabearer cheques abiza i Z$10 million, $5 million kanye le Z1$ million enyangeni ezimbili ezedluleyo. Lanxa lelibhanga lithe imali le entsha izabe isikhona namuhla, ayikabonakali kuzulu lanxa nje sekuzwakele ukuthi sebekhona asebeyibonile eharare.

Esethula imali entsha, usibalukhulu webhanga lesizwe uMnumzana Gideon Gono uthe lokhu kuzasiza abantu bona akadesebehlala emizileni yemabhanga ngenxa yokusweleka kwemali okulamaviki amabili kuqalile. Kodwa isifiso sikaGono sokuthi uzulu uzasizakala ngemali le entsha sizakubanzima kugcwaliseka ngoba abantu lokhu beyiswela imali emabhanga kanti intengo yezinto ikhwela phose nsuku zonke.

Abanengi abakhulume lalumsakazo bathe iyamukeleka imali entsha kodwa besabela ukuthi izakhweza intengo yezinto kanye lokuwa kwamandla emali yakuleli uma Iqathaniswa lezakwamanye amazwe ngesiqubu esikhulu. Banengi njalo abathi ababoni ukuthi izasiza ngani imali entsha ngoba udubo kungesikusweleka kwemali ezinkulu Kodwa luyikuphela kwamandla emali yakuleli. Lokhu kuza ngesikhathi uzulu ethithibele emelele impumela yokhetho lukamongameli, eyiyo ekhangelelwe ukutshengisa ukuthi izwe liyangaphi kwezemali lomnotho.

Abantu besabela ukuthi uma uMongameli Robert Mugabe enqobile izakuwa ngamandla imali kanti ukunqoba kwelinye lamabandla aphikisayo kungaqondisa isimo sezemali sona esesileminyaka edlula itshumi sibucayi. Kwezokhetho, i Zimbabwe Electoral Commission isiyehlulekile njalo ukupha uzulu impumela ecgweleyo yokhetho lwe Senate njalo ithi akulanto embi Ngokuphuza kwayo kulokhu ngoba ilomsebenzi omnengi kulolukhetho uma kuqathaniswa lolwadlulayo.

Akukaziwa ukuthi impumela yokhetho lukamongameli, yona ebhekwe ngamehlo abomvu, izatholakala nini.

Ezinye Indaba NgesiNdebele...

XS
SM
MD
LG