Amaqembu enguqu amela ilizwe emidlalweni yokudinga intshantshu zezwekazi le Africa i Dynamos le Highlanders alakho ukungachaphi kuhlandla elilandelayo nxa kukhangelwa indlela lawo maqembu adlale ngayo ngempelaviki.
I Dynamos yona enqobe iqembu le Costa Do Sol elase Mozambique nge 3 ka 2 nxa sekuhlanganiswa impumela yemidlalo emibili edlalwe yilawa maqembu izadibana leqembu eliphethe isicoco se Champions League i Eoile Du Sahel yase Tunisia esigabeni esilandelayo njalo owenza izifundo zemidlalo u S’dani Dlodlo uthi lokhu okukhulunywa liqembu le Dynamos ukuba kaliphathwanga kuhle e Mozambique kuzabe sekuphindwe kabili ngoba kuvamile ukuhlukumeza amaqembu emazweni awe West lase North Africa. I Dynamos idliwe 2 ka nya yi Costa Do Sol izolo
Kuthi ko Bulawayo i qembu le Highlanders lidlulele kusigaba esilandelayo somncintiswano we Confederations Cup ngemva kokukhulela i Green Buffaloes yase Zambia nge 1 ka nya okutsho ukuba nxa sekuhlanganiswa lempumela yomdlalo wakuqala phakathi kwalawa maqembu i Bosso i nqobe nge 2 ka 1. Loba kunjalo inengi labalandeli baleliqembu basele bengakholwa ukuba lilakho ukuyakhatshana kulumncintiswano ngoba lidlale ngendlela engasuthisiyo okokuthi bekungaba lempumela ehlukileyo aluba iqembu lase Zambia belilabagadli abatshisayo. I Highlanders izadibana leqembu elizaphuma phakathi kwathi i El Merreikh yase Sudan loba i Rayon Sports yase Rwanda okuyinto enika abasekeli baleliqembu ithemba lokuba mhlawumbe lingafika kusigaba se group stage ngoba womabili lawamazwe e Rwanda le Sudan engeladumo oluyangaphi emdlalweni kanobhutshuzwayo. …………………………………………………………………………………………………………………………………………………………………………………………………………………………………… Sikhangele ukuba zidlale njani kusigaba se Premier Soccer League ngempelaviki; Ngomgqibelo i qembu le Njube Sundowns litshaye ele Monomotapa nge 2 ka 1 emdlalweni obuse nkundleni yase Pelandaba, i Motor Action idle i Masvingo United ngemiklomelo emibili kowodwa emdlalweni obuse nkundleni ye Motor Action Sports Club kuthi iqembu le Kiglon litshaye ele Shooting Stars nge 1 ka nya emdlalweni obuse Dzivarasekwa kuthi ngensonto i Caps United le Caps FC zibe ngutshiki lobhanqa 0 ka 0 enkundleni yase Gwanzura kwaba ngesifanayo njalo phakathi kwe Chapungu le Eastern Lions enkundleni yase Ascot kuthi i Gunners inqobe i Underhill nge 2 ka 1 ngase nkundleni yase Dzivarasekwa. …………………………………………………
Sikhangele umdlalo kakhilikithi kulokwesabela ukuba imidlalo ye Logan Cup ilakho ukungadlalwa elizweni ngenxa yokungahlaliseki okukhona okudalwa yikungakhitshwa kwempumela yokhetho. Limidlalo ye Logan Cup B bekumele iqale ngeviki eledlulayo kodwa yasidluliselwa phambili kuliviki ngoba abaqoqi bayo becabanga ukuba impumela yokhetho izabe isisaziwa kodwa ilakho ukufuqelwa phambili futhi ngoba limpumela ilokhu ingakethulelwa uzulu.
