Ele Bhilithane lele Melika abikwa eququzela ukuthi udaba lweZimbabwe luhluzwe emhlanganweni weUnited Nations Security Council ozakwenzelwa eSouth Africa kusasa.
Injongo yalumhlangano emqoka ngeyokuhluza ubudlelwano bomanyano weUN loweAfrican Union (AU). Kodwa eleBhilithane leleMelika aithi lazafuqa ngamandla ukuthi insumansumane yokhetho lweZimbabwe ihluzwe kulumhlangano.
Kunjalonje, ibandla elibusayo kweleSouth Africa iAfrican National Congress (ANC) lithi laloba umkhokheli walo esithi kakulahlupho eZimbabwe, lona libona kulenkinga enkulu emele ilungisiswe ngesiphangiphangi.
UMnu Sydney Mufamadi, umphathintambo wogatsha olubona ngezabelo kulelozwe ugcizelele kuntathelizindaba ePretoria lamuhla ukuthi umanyano weSADC wenze konke okusemandleni awo ukuthi uphume lesinqumo osithetheyo ngeZimbabwe.
Ibandla eliphikisayo kwele South Africa ele Freedom Front Plus lona selikhuthaze umgcinisihlalo wedale lephalamende ukuthi abize umhlangano wesiphangiphangi wokuhlaziya udaba lwempumela yokhetho lweZimbabwe.
Kunjalo ingcwethi ecubungula ezombusazwe uMnu George Mkhwananzi utshele uSithandekile Mhlanga weStudio 7 ukuthi ukungenela kwamazwe aphetsheya kudaba lweZimbabwe akusoze kulethe umahluko omkhulu nxa angomakhelwane ikakhulu akeSADC engenzi lutho olulesisindo.