Ekuqhubekeni kodlakela lwezombangazwe elizweni kubikwa amasotsha izolo abetshaya izakhamizi zemizi yabanengi eHarare lakoBulawayo.
Kuthi emaphandleni abasekeli bamabandla aphikisayo babikwa betshwaywa kabuhlungu kuthi abesifazane bebhinywa. Imizi lezifuyo kubikwa kutshisiwe kwezinye indawo zemaphandleni eMashonaland.
Lanxa esigabeni semandebeleni loludlakela belungakafiki kusibanga esibi esigabeni seBubi lubikwa sekuqhamuke ucuku lodlakela olubangelwa ngabalwa impi yenkululeko, amawar vets, amasotsha labasakhulayo, ama green bomber. Izakhamizi zemaphandleni ezinengi zibikwa seziphephelele emadolobheni zibalekela loludlakela olubikwa selulezidumbu ezine.
Ibandla leMDC eliokhokhelwa ngumnu. Morgan Tsvangirai lithi selidinga uncedo kunhlanganiso ezizimeleyo ukuthi ziphathise iziphepheli lezi esezigcwele emahofisini alelibandla eHarare lakoBulawayo. Omela isigaba seNkayi North edaleni lephalamende njalo engumsekeli wesikhulumi secele leMDC elikhokhelwa nguMnu. Morgan Tsvangirai, uMnu. Abednico Bhebhe uthi lamuhla kubonakale amasotsha esigabeni sakhe osekutshiye izakhamizi zithithibele.