amalinks wokungena

Breaking News

Kubotshwa Inkulungwane Zabasekeli BeMDC EHarvest House EHarare


Icele le MDC elikhokhelwa nguMnu. Morgan Tsvangirai lithi amapholisa abophe abasekeli balo abedlula amakhulu amabili lamuhla emahofisini ebandla leli eHarvest House eHarare lamuhla.

Abantu laba bebehlala emahofisini ebandla leli ngemva kokubaleka emizini yabo, ikakhulu emaphandleni, lapho okubikwa ukuthi kulodlakela olwesabekayo, olwenziwa ngabasekeli bebandla le ZANU PF abagoqela ibutho, ababengabalweli benkululeko kanye labatsha balelibandla, lokhu kwaphela ukhetho luka Mbimbitho.

Isikhulumi samapholisa uMnu. Wayne Bvudzijena ubikwa esithi ngokubopha lababantu, amapholisa adinga abantu abangabe benza amacala kwezinye izigaba zelizwe babalekela emawofisini alelibandla. Igqwetha elibamelayo, uMnu Alec Muchadehama uthi amapholisa asabacubungula lababantu njalo abaketheswa icala.

Umsekeli kamongameli walelicele uNkosazana Thokozani Khuphe, utshele uSithandekile Mhlanga we Studio 7 ukuthi phakathi kwababotshiweyo, kulomela i Dzivarasekwa edale lephalamende, uNkosikazi Evelyn Masaiti kanye labantwana.

Amapholisa abikwa njalo egqekeze ihofisi yenhlanganiso ye Zimbabwe Election Support Network, iZESN lamuhla ekuseni esithi adinga impahla lengwalo acabangela ukuthi zingaba zilenhlelo zalinhlanganiso zokugenqula uhulumende embusweni.

Isiphathamandla salinhlanganiso, uMnu Noel Kututwa, utshele iStudio 7 ukuthi amapholisa la ahambe lesinye isiphathamandla senhlanganiso yakhe uNkosazana Tsungai Kokerai, esithi afuna ewancedisa ekudingisiseni akufunayo. Inhlanganiso ezimeleyo elwela ilungelo loluntu, i Amnesty International yethule umbiko osola isenzo samapholisa lesi.

Ngakwezinye izigaba zelizwe udlakela lubikwa lokhu luqhubekela phambili ezigabeni ezitshiyeneyo zelizwe njalo ezinye imuli ebezithembe ukubalekela eHarvest House, zibikwa seziswele ukuthi zizaqonda ngaphi kulandela ukugqekezwa kwamahofisi alelibandla.

Kusenjalo kulamalunga enhlanganiso yeRevolutionary Youth Movement of Zimbabwe edlula ikhulu abotshwe kweleSouth Africa lamuhla etshengisela emawofisini omeli weChina kulelolizwe, eTswane.

Amalunga la, ebekhonona ngodaba lwezikhali ezithengwa ngeleZimbabwe kweleChina. Sikhuluma nje avalelwe enkambeni yeSunny Side eTswane. Imizamo yokuxhuma amapholisa ngaloludaba yehlule.

Omunye wababotshiweyo uMnu Julius Makhulu utshele uNtungamili Nkomo weStudio 7 ukuthi bebekhonona kakhulu ngokhumbi wezikhali ezithengwe kweleChina ngeleZimbabwe obikwa ulubhekise kweleAngola ukuyakwethula lezizikhali okhunjini lolwandle kulelilizwe. Lokhu kulandela ukwalelwa kwawo ukwethula lezizikhali ngamazwe athi iSouth Africa, Mozambique leNamibia.

Ezinye indaba ze studio 7...

‚Äč
XS
SM
MD
LG