amalinks wokungena

Breaking News

Ilunga LeMDC Elabulawa Ngama War Vets Lingcwatshwa Nsitha Ngabasekeli beZanu PF


Ekuqhubekeni kodlakela lwezombangazwe elizweni jikelele icele leMDC elikhokhelwa nguMnu. Morgan Tsvangirai lithi ilunga lebandla leli emudzi, esigabeni seMashonaland East elabulawa kuviki edluleyo, uThemba Muronde, ungcwatshe ngabasekeli beZanu PF izolo.

UMuronde ubikwa efe ngemva kokutshaywa ngabacatshengelwa ukuthi ngama War Vets. Lokhu kubikwa sekutshiye abasekeli bebandla lemdc bethithibele. Kunjalo nje, esigabeni seMandebeleni obekuthuli kudaba lodlakela olwaqhamuka ngemva kokhetho lwenyanga edluleyo, kubikwa sekulokuhlukuluzwa lokutshaywa kwabantu.

Esigabeni sebubi kubikwa izolo kutshaywe abantu abanengi abanye babo baze baphephelela edolobheni lakoBulawayo uChris Gande weStudio 7 uxoxe lesakhamuzi seJambezi eHwange esingafunanga ukubethwa ngegama sichasisa ngokuqhubeka kodlakela kulesisigaba. Umkhokheli wecele leMDC elithi lanqoba kukhetho lukaMongameli, uMnu Morgan Tsvangirai, uzaqhubeka ngenhlelo zakhe zokudinga usekelo ngodaba lokhetho kunkokheli yezwekazi leAfrica ngokuba lomhlangano lomgchinisihlalo weafrican union umnu jakaya kiketwe onguMongameli njalo weTanzania kusasa.

Isikhulumi sikamnu tsvangirai, umnu George Sibotshiwe utshele lumsakazo ukuthi uMnu. Tsvangirai uzachaya imisebenzi yobudlova enziwa ngabasekeli beZanu PF kumnu kiketwe ecele njalo ukuthi iau ingenele kudaba lolu. Kusenjalo isikhonzi seMelika ezwekazi leAfrica uNkosazana Jendayi Frazer, yena ophakathi kokwethekelela lelizwekazi ekhuthaza inkokheli ukuthi ibonise umugabe ukuthi kusina kudedelwana lamuhla wethule amazwi athi nxa kudingeka ukuthi kwenziwe uhulumende womanyano eZimbabwe, kumele ukhokhelwe ngumnu Tsvangirai.

Limbiko iza ngesikhathi insumansumane yeZimbabwe ikhangelelwe ukuhlaziywa lidale leUnited Nations Security Council ngoLwesibili. Icele leMDC eka Tsvangirai lithi selibumba uhulumende walo ngoba lileqiniso ukuthi lanqoba kukhetho. Sixhume ingcwethi ecubungula ezombusazwe uMnu Qhubani Moyo, owancintisa kukhetho eInsiza East wanqotshwa othi imihlangano kamnu Tsvangirai lenkokheli yamanye amazwe iqakathekile kakhulu nanku udaba lweZimbabwe soluze lwafinyelela ku United Nations.

Ezinye izindaba zeStudio 7 ...

XS
SM
MD
LG