Izakhamizi zeHeadlands zibikwa zikhulele abasekeli beZanu PF abalitshumi lanhlanu kade behlome ngombhobho bathatha lesi sikhali. Lumbhobho olenombolo ezithi za/ 40874 usiwe emapholiseni.
Izakhamizi ezimbili zibikwa zilimele ekulwisaneni okwanzekeleyo umbhobho ungakathathwa. Ekuqhubekeni kodlakela lwezombusazwe abasekeli bebandla leZanu PF lamawar vets babikwa betshisele izakhamizi zeMakoni North imizi, kodwa kwabotshwa abasekeli bebandla leMDC. EShamva kubikwa kutshiswe imizi edlula ikhulu yabacatshangelwa ukuthi bavotela ibandla leMDC.
Kwelemandebeleni izakhamizi zenkayi zibikwa sezibalekile ngemva kokuqhamuka kodlakela kuthi esigabeni seBubi abanye ababili abatshaywe kabuhlungu ngama war vets babikwa bequnywe iminwe ngabodokotela ngemva kokugqulwa izandla ngensimbi ngama war vets.
Inhlanganiso zokholo zithi ziphakathi kokudingela uncedo labo abaphephele emadolobheni ngoba bengelangubo wona umqando usuqalisile. Isikhulumi somanyano weChristian Alliance, umfundisi Ray Motsi uchasisela uChris Gande weStudio 7 okunengi ngaloludaba.