Kulamakhulu abantu abavela eZimbabwe asebeqalisile ukungena kweleBotswana bezodinga ubuphepheli bebalekela udlakela oseluqhamuke elizweni ngemva kokhetho lwenyanga edluleyo.
Uhulumende weBotswana uthi uyavuma ukuthi kulodubo eZimbabwe njalo uzanceda labo abangabe bedinga ubuphepheli kulelizwe. Umphathintambo obona ngendaba ezenzakala phandle kwelizwe, uMnunzana Phandu Skelemani uthi iBotswana izabona ukuthi inganceda njani labo abalekela isimo esikhona eZimbabwe.
Okukhulunywa nguMnunzana Skelemani kutshiyene lendlela iSouth Africa ephatha ngayo udaba lweZimbabwe. Umongameli Thabo Mbeki uthi akulampi eZimbabwe ngakho akulasidingo sokuthi inikeze izizalwane zeZimbabwe ubuphepheli. Kodwa eleBotswana seliqalisile ukulungiselela abangena elizweni leli bevela eZimbabwe bezodinga ubuphepheli.
Edolobheni leSelebi-Phikwe eliseduzane lomgcele weZimbabwe leBotswana, amasotsha asemise amathende alitshumi lapho okuzahlala khona iziphepheli. USikomitshi walelidolobho, uMnunzana Khumo Keeng utshele istudio 7 ukuthi sebethengile okunengi okufunakalayo okufana lengubo kanye lokudla ukunceda abadinga ubuphepheli. Inengi elifikele edolobheni leSelebi-Phikwe lidluliselwe eFrancistown lapho okulendawo yokungcinela iziphepheli.
Phakathi kwalabo abazodinga ubuphepheli ngomama abalabantwana abancane. UMnunzana Keeng uthi konke kungalunga eSelebi-Phikwe, abanye bazahlaliswa khona ngoba indawo yeziphepheli eFrancistown isigcwele.
Okwakhathesi iBotswana igcine iziphepheli ezilikhulu ezivela eZimbabwe, ezinye ezafika kudala zibalekela impi yenkululeko. Ugatsha olubona ngokuhluzwa kweziphepheli, olwe refugees advisory board, luzahlangana ensukwini ezinlutshwana ezilandelayo ukuze lutsho ukuthi ngobani abazothola ubuphepheli kulabo asebefikile kweleBotswana.