amalinks wokungena

Breaking News

UMnu. Morgan Tsvangirai Unqobile Kodwa Kumele Kube Lolunye Ukhetho LweRun-Off: ZEC


Ikhomisheni ebona ngokuqutshwa kokhetho elizweni, iZEC, isize yazisa impumela yokhetho lokudinga uMongameli. Likhomisheni yazise ukuthi umnu. Morgan Tsvangirai nguye onqobileyo, ethola isilinganiso samavothi esiphansi kwamatshumi amahlanu ekhulwini, 47 percent, elandelwa nguMugabe othole 43 percent.

Okutsho ukuthi ababili laba sekuzamela bacintisane kukhetho lwesibili irun-off. IZEC ithi yazisa limpumela ukwenzela ukuthi icele lika Tsvangirai lalo lethule impumela elilayo besekulinganiswa kusasa kuvunyelwane ukuthi impumela engaba yiyo sibili ngeyiphi. Icele likaTsvangirai lithi uMongameli walo unqobe okwedlula i50 percent levoti elilodwa okungadingi olunye ukhetho lwe run off. Lelibandla lithi njalo nxa kungenziwa olunye ukhetho kungacitheka igazi elinengi ngoba sokuqhamuke udlakela lwezombusazwe ngemva kokhetho lukamhlaka 29 ngoMbimbitho lanxa impumela ikhona iphuma lamuhla.

Phansi kwemithetho yezokhetho uTsvangirai engala ukungena kukhetho lonalolu u Mugabe uzahle athiwe nguye onqobileyo. Isiphathamandla salelicele, uMnu. Sam Sipepa Nkomo utshele uChris Gande weStudio 7 ukuthi vele kabasoze bavume ukwenza olunye ukhetho, irun-off.

Kunjalo nje, amagqwetha amela uMongameli Mugabe kudaba lokuqutshwa kokhetho lokudinga ilunga ledale lephalamende elizamela isigaba seMpopoma-Pelandaba asecele umththwandaba ukuthi udlulisele lelicala lithoniswe ngeviki ezayo.

Omunye wabafuna ukuncintisa kulesisigaba njalo eligqwetha, uMnu. Job Sibanda ukhweze loludaba emthethwandaba ecela ukuthi ubambe umugabe ngamandla ukuthi abeke ilanga lokhetho lwalesisigaba. Ukhetho lweMpopoma-Pelandaba alwenziwanga ngoMbimbitho ngemva kokubhubha kuka mnu. Milton Gwetu owecele leMDC elikhokhelwa nguMnu. Arthur Mutambara owayemela leso sigaba sokuzaqhutshwa ukhetho. IGwanda South le Redcliff ngezinye izigaba ezilahlekelwe sekuzakwenziwa ukhetho, lazo ezingakabi lokhetho. UChris Gande weStudio 7 oxoxe loMnu. Sibanda ukuze sizwe okunengi ngaloludaba.

Ezinye izindaba zeStudio 7 …

XS
SM
MD
LG