Icele le MDC elikhokhelwa nguMnu. Morgan Tsvangirai libikwa lisithi selithole isidumbu selunga lalo uMnu. Tonderai Ndira, onyamalale kuviki ephelileyo ngemva kokuthathwa ngabacatshangelwa ukuba ngabasekeli bebandla le ZANU PF.
Ibandla leli lithi lincetshwe indlebe ngabasebenza emotsha yesibhedlela se Parirenyatwa eHarare, lapho isidumbu lesi esitholakale khona. Kusenjalo abatsha bebandla leZANU PF abaziwa ngokuthi ngama ‘green bomber’ babikwa bechithachithe umngcwabo wamalunga alelicece amabili e Warren Hills, uGodfrey Kauzani lo Cain Nyevhe ababikwa babulawa ngabasekeli bebandla le ZANU PF. Udlakela luyaqhubeka njalo ezigabeni ezigoqela i Buhera, Masvingo le Manicaland njalo kubikwa sekwafa amalunga amabandla aphikisayo angamatshumi amane lanhlanu, lokhu lwaqalisayo.
Kwele Matabeleland, umumo ubikwa umumethe okungaziwayo ngoba inkamba zababengabalweli bempi yenkululeko lokhu zikhona phose ezikolo lemavinkilini wonke. UMnu. Thandeko Zinti Mnkandla,isikhulumi secele le MDC elikhokhelwa nguMnu. Arthur Mutambara e Matabeleland South, utshele uSithandekile Mhlanga we studio 7 ukuthi ngokuba khona kwenkamba lezi, abantu abakhululekanga ngoba bengakwazi ukuthi abantu laba bajongeni.