amalinks wokungena

Breaking News

Udlakela Lokutshaywa Kwezizalwane Zakwamanye Amazwe Kwele South Africa Luqhele Lwafika ECape Town


Udlakela olwenziwa yizizalwane zakwele South Africa kuzizalwane zakwamanye amazwe lubikwa namhla luqhubeke esigabeni seCape Town lapho abantu abatshaywe, badilizelwa izindlu, lamabhizimisi abo. Izitolo zezizalwane zeSomalia zibhidliziwe bathathelwa impahla.

Laloba imibiko evela kwabanye abezindaba isithi abantu abedlula inkulungwane esingamatshumi amabili lanhlanu - 25 000 yibo asebedudulwe, inhlanganiso ebona ngeziphepheli i United Nations Commission For Refugess ithi abantu asebelahlekelwe yimizi bedlula inkulugnwane ezingamatshumi alitshumi lasikhombisa- 17 000.

Sokufe abantu abangamatshumi amane lambili kusukela udlakela lolu luqhamuke emavikini amabili edluleyo. Inhlanganiso le isikhuthaze uhulumende we South Africa ukuthi agcine izizalwane zeZimbabwe kulelo lizwe ngoba lakho eZimbabwe umumo ungemuhle.

NgolweSihlanu ababona ngezomvikela kwele South Africa bethule umbiko wokuthi abakhanya befuqa ukuhlukuluzwa kwezizalwane zakwamanye amazwe ngabamhlophe abalobudlelwano lowayenguhulumende wobandlululo kulelilizwe.

Umqondisi we National Intelligence Agency, uMnumzana Manala Manzini uthi ekucubunguleni kwabo lloludaba bafumane ukuthi kusetshenziswa abebandla le Inkatha Freedom Party ukuqhuba lobubudlwangudlwangu.

Intathelizindaba yeStudio 7 u Benedict Nhlapho ithi bekulokufuthelana emizini ehlala abanengi edolobheni le Johannesburg ngolweSihlanu lapho abavela kwamanye amazwe sebethuselwe ukuthi baphume baphele endaweni abahlala kizo ilanga langeSonto lingakafiki. Usethulela loludaba ese Johannesburg, South Africa.

UBrenda Moyo we Studio 7 ukhulume lomunye wabawelwe yingozi, odilizelwe indlu yakhe emzini we Ronderburg ngolwesithathu ebusuku, umnewabo wabhidlizelwa indlu abethengisela kiyo impahla. UMnumzana Savious Mlada Sibanda uchasisa ngodubo ababhekane lalo kwele South Africa.

UBrenda Moyo uphinde waxhuma uReverend Nicholas Mukaronda osebenzelana labanye abezinkonzo ezehlukeneyo abaphathisa laba abangasela ndawo zokuhlala. UMukaronda ucasise ngezinye zezinswelo zalababantu asebegcinwe enkambeni zamapholisa lasezinkonzweni.

Ezinye indaba ngesiNdebele...

‚Äč
XS
SM
MD
LG