Inhlanganiso yababengabalweli bempi yenkululeko iZimbabwe Liberators’ Platform Peace Initiative, (ZLPPI) ithi isiphumelele ekuchitha-chitheni inengi lezinkamba zababengabalweli bempi yenkululeko abahlukuluza abantu ezigabeni ezitshiyeneyo zelizwe.
Lokhu kwenzakala udlakela lubikwa lulokhu luqhubekela phambili ezigabeni zelizwe ezitshiyeneyo, njalo imuli ka Mnu. Nelson Chamisa, isiphathamandla secele le MDC elikhokhelwa nguMnu. Morgan Tsvangirai, egoqela abazali bakhe ibikwa itshaywe kabuhlungu eGutu ngama ‘green bomber’ lamasotsha, kwathi omunye ukhansila walesosigaba wahlahlelwa ngehloka.
Umkhokheli we ZLPPI uMnu. Max Mnkandla, utshele uSithandekile Mhlanga we studio 7 ukuthi kusobala ukuthi abenza udlakela bathunywa yizikhulu zebandla le ZANU PF njalo ugeza umkhokheli we Zimbabwe National Liberation War Veterans Association, uMnu. Jabulani Sibanda esithi uhlezi ebakhuza ukuthi bengenzi lobu budlwangu-dlwangu.