Ibandla leMDC leleZanu PF abikwa esebumbe ikhomidi yokuzama ukuqeda udlakela lwezombusazwe oseluthethe imphefumulo yabantu abedlula amatshumi amahlanu.
Lanxa imizamo le esungulwe yikhomidi ebona ngokuqutshwa kokhetho elizweni iZimbabwe Electoral Commission isilamaviki phose amathathu, udlakela lubikwa lulokhu luqhubekela phambili endaweni ezitshiyeneyo zelizwe. Lamuhla umkhokheli wecele leMDC uMnu. Morgan Tsvangirai uqhubeke ngokuhambahamba ekhulumisana lozulu edolobheni lePlumtree ngemva kokuvalelwa enkambeni yamapholisa elupane izolo okwamahola afika phose alitshumi.
ERusape abazithi balwa impi yenkululeko babikwa bebuthanise izakhamizi zabhaxabulwa ngezamboko. Enyanga esigabeni sako Katerere izakhamizi zibikwa zibanjwa ngamandla ukuthi ziphekele ukudla abasekeli beZanu PF abavile inkamba zokuhlukuluzela abantu. EGweru abasekeli bemdc abane babikwa belimele kakhulu ngemva kokuba imota kade behamba ngayo idutshulwe amavili ngabasekeli beZanu PF. Abantu laba kade bevela kudili lokuthakazelela ukungqoba kukankosazana Siphiwe Ngulube owakhethwa ukuba ngukhansila weNsukamini ward. Unobhala obona ngezokuqutshwa kokhetho esigabeni seMidlands South, uMnu. Obert Ncube utshele uChris Gande weStudio 7 okunengi ngaloludaba.
Kunjalo nje, bekungabizwa ozwayo kudili likankosazana Siphiwe Ngulube owangqoba kukhetho lokudinga ukhansila we Nsukamini ward. Ekhuluma emkhosini lo, uNgulube uthe ibandla leZanu PF vele lizangqotshwa kukhetho lukamhlaka 27. Asizweni imbiko yakhe: