Uhulumende weBotswana uthi uzaqhubeka ebuyisela muva abeZimbabwe abangena kulelizwe okungekho emthethweni bezodinga ukuziphilisa.
IBotswana ithi noma nje eZimbabwe umumo ungamanga kahle, ayisoke iyekele abantu bengena elizweni okungekho emthethweni. IBotswana ithi inengi elibuyiselwa emuva ngabantu abangena elizweni okungekho emthethweni bezodinga imsebenzi. Uhulumende uthi abeZimbabwe ababalekela isimo sombusazwe kumbe ukuhlukuluzwa nguhulumende kamongameli Robert Mugabe bayakwazi ukuthi kumele baqonde ngaphi.
Isikhulumi sehofisi kamphathintambo obona ngendaba zaphakathi kwelizwe uNkosazana Lebogang Bok uthi uhulumende uzaqhubeka ngokubuyisela emuva abeZimbabwe abangena ebotswana ukungekho emthethweni. Uthi noma nje kuloku khonona okuvela emabandleni aphikisayo, uhulumende kasoke aguqule isinqumo sokubiyisela emuva abangena ebotswana okungekho emthethweni bezodinga ukuziphilisa. Ubok uthi uhulumende uzanikeza ubuphepheli kulabo ababalekela ukuhlukuluzwa ngenxa yesimo sombusazwe ezimbabwe hatshi abazodinga ukuziphilisa.
Abamabandla aphikisayo kanye labalwela amalungelo oluntu bathi uhulumende weBotswana kumele amise ukubuyisela abeZimbabwe emuva njengoba isimo sezombusazwe singamanga kuhle. Amabandla lenhlanganiso lezi, bathi labo aba buyiselwa eZimbabwe balakho ukuhlukuluzwa ngamalunga ebandla elibusayo, ngesikhathi udlakela luqonga elizweni. UBok laye uthi noma uhulumende evumelana lalumqondo, kunzima ukuthi iBotswana iyekele abantu bengena elizweni santando bengafakelwa imgoqo.
Uhulumende uthi inengi elibuyiselwa eZimbabwe liyaphenduka kungakapheli insukwana. Kulenkulungwane zabeZimbabwe ezeqa umgcele weBotswana nsukuzonke ukungekho emthethweni zizodinga imsebenzi. Uhulumende weBotswana uyavuma ukuthi useyehlulekile ukwenqabela abeZimbabwe abeqa umngcele okungekho emthetweni.