Amapholisa lamuhla avale inhlanganiso ezizimeleyo endaweni ezitshiyeneyo zelizwe. Lokhu kuza ngemva kokuba uhulumende azise lezinhlanganiso kuviki edluleyo ukuthi zimele zitshiye umsebenzi.
Kodwa kuncwadi ayithumele lezinhlanganiso kuviki edluleyo uMnu. Nicholas Goche oyisiphathamandla sikahulumende uthe lezinhlanganiso kumele zimise inhlelo zazo zemaphandleni ngoba uhulumende ulobufakazi bokuthi zisebenzelana lebandla eliphikisayo eleMDC.
Umgcinisihlalo womanyano wenhlanganiso ezizimeleyo, iNANGO, enkabazwe, uMnu. Peter Muchengeti utshele uChris Gande weStudio 7 ukuthi izikhulu zamapholisa zimtshele ukuthi atshele inhlanganiso zonke ezizimeleyo ukuthi zingavula amhofisi azo zizabe zephule umthetho. UMuchengeti uqala ngokuchasisa ukuthi utshengise amapholisa la incwadi eyalotshwa nguGoche ukuze azibonele ukuthi akuzange kuthiwe lezi nhlanganiso zivalwe.
Kunjalo nje, ukumiswa kwenhlanganiso ezizimeleyo njalo lezokhola ukuthi zabele abalambayo ukudla sokuhlasele lezakhamzi zemadolobheni ebezithola lolusizo kwatshiya labaphila legcikwane besengozini ngemva kokuswela ukudla okwenelyo obekwabiwa yilezinhlanganiso.