Inhloko kahulumende wele bhilithane, uMnu Gordon Brown endawonye lomongameli wele melika u Mnu. George Bush, basole kakhulu udlakela oluselizweni, besithi luzanqabela ukhetho olukhululekileyo kweleZimbabwe.
Ekhuluma lentathelizindaba emhlanganweni kwelebhilithane lamuhla, uMnu. Brown usole kakhulu ukutshaywa lokubulawa kwamalunga amabandla aphikisayo, esithi kumele kuthunyelwe inane elithe xaxa labantu abazahlola ukuqhutshwa kwalolukhetho ngendlela yokwenqabela ukuqilibezela.
Umongameli Robert Mugabe uhlezi echothoza ibandla le MDC esithi lisetshenziswa yinkokheli yamazwe aphetsheya, ikakhulu abaMnu. Bush lo Brown, ngendlela yokufuna ukubuyisela ilizwe kwabamhlophe.
Amanye amazwe agoqela ele Australia, inhlanganiso ye United Nations kanye lenhlanganiso ezilwela amalungelo oluntu lazo zisola umumo okhona elizweni, zisithi awufanelanga ukwandulela ukhetho.
Umsekeli wecele le MDC elikhokhelwa nguMnu. Morgan Tsvangirai, uNkosazana Thabitha Khumalo, utshele uSithandekile Mhlanga we studio 7 ukuthi njengebandla bayathokoza ngosekelo abaluthola kuloba ngubani ofuna umbuso kamugabe owoncindezelo uphele.