amalinks wokungena

Breaking News

Unobhala Jikelele WeMDC Useze Wavunyelwa Ukuhlawula I-Bail


Unobhala jikelele webandla le MDC uMnu. Tendai Biti useze wavunyelwa ukuthi ahlawule imali yesibambiso eye Bail engange one Trillion yamadola ase Zimbabwe ukuze icala lakhe lithonisiswe esuka emzini wakhe engavalelwanga.

U Biti owetheswa icala lokudinga ukugenqula uhulumende, ukuthuka umongameli welizwe kanye lamanye amanengi. Nxa ethe wafunyanwa elecala ulakho ukulengiswa. Ngemva kokuhlawula leyo mali umthethewandaba weHigh Court uphinde wathi kumele anikeze amaphepha endlu yakhe phezu kokuba uzamele azibike kanye ngeviki emapholiseni bamthathela lengwalo zokuhambisa iPassport.

Ophe lesisinqumo u Justice Ben Hlatshwayo walile isicelo sabatshutshisi bakahulumende esokuba u Biti abe lokhe evalelwe esithi kumele ngabe ngalesi sikhathi sebahlanganise ubufakazi babo ngoba amaviki amabili asedlule ngemva kokuvalelwa kwakhe.

U Biti wetheswa icala lokuloba ugwalo olukhuthaza ukuba kugenqulwe uhulumende kaMongameli Robert Mugabe kanye lokumthuka kodwa ingcitshi zezombusazwe zithi lokhu yimizamo yebandla le ZANU PF eyokutshabalalisa abayiphikisayo besithi kufana nje lalokho okwenziwa ababengabebandla le PF ZAPU ngeminyaka yabo 1980s abagoqela ababekhokhela ibutho le ZIPRA uMnumzana Dumiso Dabengwa kanye lo muyi uMnumzana Lookout Masuku ababesetheswa icala lokubuthanisa izikhali zempi ngenjongo yokufuna ukukhipha uhulumende ka Mugabe besebenzisa impi yomvukela.

Omunye wamagqwetha kaBiti uMnumzana Matthias Zhou uthi lolu gwalo alulotshwanga ngu Biti njalo lokhu bazakuveza lapho okuzangena khona lelicala. UBiti obotshwe mhla zilitshumi lambili kuyonale inyanga wetheswa njalo icala lokuqamba amanga ngemva kokukhipha kwakhe imibiko ebisithi inhlanganiso yakhe kanye lomongameli wakhe uMnumzana Morgan Tsvangirai yibo abanqobe kukhetho olwenziwe mhla zingamatshumi amabili lesikhombisa ngenyanga kamabasa njalo ubotshwe evela e South africa lapho akade esephephele khona ngemva kwalolukhetho ludale ukuba kube lwempinda yokhetho lokudinga umongameli welizwe ehlelwe ukuba khona kusasa loba nje uMongameli we MDC u Tsvangirai ethe akasoze ephatheke kilo ngesizatho sokuba akatholanga ithuba lokukhankasa ndawonye lokuhlukumezwa kwabalandeli bakhe.

Kulokwesabela ukuba abatsha beqembu elibusayo balakho ukubamba ngamandla abantu ukuba bayevota ukuze amazwe aphandle abone angathi izinto zonke zihamba ngendlela njengoba inengi labantu esigodlweni lisithi alisoze lizihluphe ngokuya endaweni zokuvotela ngolweSihlanu okungadala ukuba abahlezi besola okwenzakala kuleli bathi akubanga lokhetho.

Ezinye indaba ngesiNdebele...

‚Äč
XS
SM
MD
LG