Umkhokheli weMDC uMnu Morgan Tsvangirai ukhuthaze amazwe omhlaba lamuhla ukuthi engananzi impumela yokhetho lukamongameli oluqhutshwe elizweni lamuhla.
Umongameli Robert Mugabe ungene kulolukhetho eyedwa ngemva kokuphuma kilo kukaMnu Tsvangirai esithi kalusoze luqhutshwe ngokukhululeka. Ekhuluma lentathelizindaba lamuhla uMnu Tsvangirai uveze ukuthi laloba ibandla lakhe liphumile kulolukhetho, abantu abanengi babanjwe ngamandla ngabasekeli beZanu PF ukuthi behambe beyevota, bevotele uMugabe.
Uthe ujabuliswa yikuthi sokulabakhokheli bamazwe eAfrica abanengi asebebona umumo weZimbabwe ngelihlo leMDC njalo asebesola umbuso kaMugabe. U Tsvangirai uthi ufuna kwenziwe ukhetho olukhululekileyo hatshi amadlwane enziwe yiZanu PF leZec lamuhla.
Egcizelela
amazwi kaTsvangirai, uMnu Lovemore Moyo, ongumgcinisihlalo weMDC uthe abantu
endaweni ezitshiyeneyo zelizwe babanjwe ngamandla ukuthi bahambe bayevota.
Ngakwelinye icele ibandla leZanu PF lilandule
imbiko le. Umphathintambo obona ngokukhitshwa kwembiko njalo eyisiphathamandla
esikhulu seZanu PF uMnu Sikhanyiso Ndlovu utshele uNtungamili Nkomo weStudio 7 ukuthi ukhetho
luhambe kuhle, ngaphambilini kokubhavuma ngolaka esithi kungamanga ukuthi
abasekeli bebandla lakhe bebehlukuluza uzulu bembamba ngamandla ukuthi ayevotela
uMugabe.
Kunjalo nje, emaphandleni kubikwa lakho bekulbantu abalutshwana kade bevota lanxa bekulokwethuselwa. ENkayi kubikwa kuqhamuke udlakela kusilwa amalunga ebandla leZanu PF lawe MDC kwalimala abantu abambalwa. Inhlanganiso yeBulawayo agenda ithumele iziphathamandla ukuyahlola ukhetho endaweni ezitshiyeneyo zelizwe. Isikhulumi salinhlanganiso, umnu. Lenox mhlanga, utshele uChris Gande weStudio 7 ngembiko abayitholileyo ezabelweni ezitshiyeneyo.
Ukhetho lwalamhlanje luqhubekele phambili loba amazwe omhlaba ebecebise uhulumende weZimbabwe ukuthi alumise ngemva kokukhalala ukuncintisa okwenziwe ngumkhokheli we MDC uMnu. Morgan Tsvangirai esithi kulodlkela oluzenza impumela ingananzwa muntu.
Ezitaladeni zakoBulawayo bekuthule cwaka abantu bezivalele nje emakhaya.
