Ibandla leMDC lithi ilunga lalo litshaywe laze lafa eBuhera esigabeni seManicaland izolo. Lelibandla lithi umuntu lo ofileyo ngowesifazane kodwa kalivezanga igama lakhe. Imbiko esiyitholileyo ithi udlakela lokhu luqhubekela phambili endaweni ezinengi zelizwe.
Inhlanganiso yabalimi abamhlophe, iZimbabwe Commercial Farmers’ Union ithi abalimi abamhlophe bahlaselwe izolo emapulazini abo inengi lalimala kabuhlu kwathi abanye ababili bathunjwa okokuthi sikhuluma nje akwaziwa ukuthi bangaphi.
Umsekeli kamgcinisihlalo walinhlanganiso, uMnu. Deon Theron uthi kulokwesaba okukhulu ngemva kokugcotshwa kukaMongameli Mugabe ngoba kukhanya kungelamuntu ozabotshwa ngocuku olwenzakalayo emapulazini. Kuthi inhlanganiso yamatitshala iProgressive Teachers’ Union layo ithi amalunga ayo, agoqela inkokheli athwaliswe nzima ngabasekeli bebandla leZanu PF besetheswa icala lokungaphathisanga ibandla elibusayo ngokukhankasela uMongameli Mugabe.
UMongameli walinhlanganiso, uMnu. Takavafira Zhou utshele iStudio 7 ukuthi amalunga enhlanganiso yakhe avakatshelwa ngabantu abangaziwayo phakathi kobusuku. Umsekeli wesikhulumi secele leMDC elikhokhelwa nguMnu. Arthur Mutambara njalo engomela iNkayi edaleni lephalamende uMnu. Abednico Behebehe utshele uChris Gande weStudio 7 ukuthi udlakela lukhanya luqhubekela phambili.
Abantu ababalekela udlakela lwezombusazwe emaphandleni baya emadolobheni lokhu besekucatsheni njalo bathi ababoni bephindela ngokuphangisa emakhaya besithi besaba ukuba bengatshaywa noma babulawe ngoba akukabikhona ukuthula kubasekeli bamabandla aphikisayo lanxa nje uMongameli uRobert Mugabe esegcotshiwe ukukhokhela ilizwe okweminyaka eyisithupha. U Thabang Mathebula Uyalandisa.
Ezinye izindaba zeStudio 7 …
