Intengo yempahla ibikwa ilokhu ikhwela ngesilinganiso esesabekayo elizweni njalo inengi labantu alisenelisi ukuthenga izinto zokusebenzisa ezimqoka ezigoqela izinkwa, impuphu kanye lochago.
Isinkwa sibikwa sesithengwa nge $53 billion kuthi imitshova igadwe nge $15 billion, okubangela ukuthi imali engane $100 billion abantu abavunyelwa ukuthi bayikhuphe emabhanga, ngelanga ingancedi lutho.
Ukudla kubikwa kutholakala emkambo omnyama kumbe kwezinye izitolo zabanini abavela kwamanye amazwe, kodwa intengo yakhona ayifinyelelwa linengi.
UMnu. Mfundo Mlilo, isiphathamandla senhlanganiso ebona ngamalungelo ezakhamizi e Harare, i Combined Harare Residents Association, (CHRA) utshele uSithandekile Mhlanga we studio 7 ukuthi inhlanganiso yakhe ilohlelo oluhlolisisa ngokukhwela kwentengo yezinto njalo lutshengisa ukuthi okwalonyaka kuyesabeka.
Edabeni olufanayo, emaphandleni kubikwa indlala ibhahile ngoba abantu bengatholanga isivuno eseneleyo, njalo lenhlanganiso ebezincedisa abantu ngokudla sezamiswa.
Umnu. Jabulani Manqonda, ongumgcinisihlalo we Nkayi South kucele le MDC elikhokhelwa nguMnu. Arthur Mutambara njalo engukhansila ka Ward 16 ko Dakamela kulesisigaba, utshele uSithandekile Mhlanga we studio 7 ukuthi amajodo abantu ababewathembile asewoma njalo lezitolo sezavalwa ngoba kungelampahla zokuthengisa.
