I United Nations Security Council ikhangelelwe ukuvota lamuhla kumbe kusasa kudaba lokuthi yethulele uhulumende kaMugabe izijeziso na.
I Melika ibikwa ibifuna kuvotwe izolo kodwa amanye amazwe ayala lokhu esithi ebengakahluzi kuhle udaba lweZimbabwe lolu. Esinye isiphathamandla seMelika esisebenza ewofisini yalelilizwe eUnited Nations esingathandanga ukuqanjwa sitshele lumsakazo ukuthi udaba lweZimbabwe lolu belungakahlelwa ukuthi luhlaziywe nini, kodwa wathi kungaba lamuhla kumbe kusasa.
Umeli weZimbabwe e UN uMnu Boniface Chidyausiku utshele
iStudio 7 ukuthi zingethulwa lezizijeziso, zilakho ukuphazamisa inkulumo
eziqalise lamuhla phakathi kweMDC leZanu PF.
Kusenjalo, idale le European Union Parliament lamuhla linqume ukuthi amazwe e Europe kumele engezelele izijeziso
phezu kukahulumende kaMugabe. Lelidale likhuthaze njalo amazwe eAfrica ukuthi
engananzi uMugabe njengomongameli welizwe.
Ngakwelinye icele, umkhokheli weliberia uNkosazana Ellen Johnson Sirleaf laye ukhuthaze amazwe eAfrica ukuthi engaze ananza uhulumende kaMugabe. UNkosazana Johnson Sirleaf ubekhuluma eseSouth Africa lamuhla.
Ingcwethi ecubungula ezombusazwe uMnu Brilliant Mhlanga utshele uNtungamili Nkomo ukuthi kungaba lusizi nxa i United Nations ingavinjwa yiChina kumbe yiRussia ukujezisa uMugabe, esithi izijeziso ze European Union zizodwa kazincedi ngalutho.
