amalinks wokungena

Breaking News

UMnu Tsvangirai Uchasisa Ngenkulumo Eziqale Izolo


Umkhokheli welinye icele leMDC uMnu Morgan Tsvangirai uthi okwenzakala kweleSouth Africa, phakathi kwebandla lakhe, elinye njalo icele leMDC elikhokhelwa nguMnu Arthur Mutambara lele Zanu PF, ayisizonkulumo zokuxazulula udaba lweZimbabwe, yisendlalelo nje sokuzalandela.

Ekuqaleni kweviki uTsvangirai lezinye iziphathamandla zebandla lakhe bebesithi kabasoze bephatheke kunkulumo ezikhokhelwa nguMongameli Thabo Mbeki oweSouth Africa. Kodwa izolo uthumele iziphathamandla zakhe ezimbili uMnu Tendai Biti loMnu Elton Mangoma.

Ibandla leZanu PF limelwa nguMnu Patrick Chinamasa loMnu Nicholas Goche kulezinkulumo, kuthi icele leMDC elikhokhelwa nguMutambara limelwa nguMnu Welshman Ncube loNkosikazi Priscilla Misihairambwi-Mushonga. Lezinkulumo zisungulwe izolo.

Iziphathamandla zikahulumende weSouth Africa eziqhuba lumhlangano zigoqela oMnu Mojanku Gumbi, Sydney Mufamadi loFrank Chikane.

Ingcwethi ecubungula ezombusazwe uMnu Walter Nsununguli Mbongolwane utshele uBrenda Moyo weStudio7 ukuthi uMnu Tsvangirai ulokhe esiyale lale ngodaba lwenkulumo lezi ngoba engelathemba ebandleni le ZANU PF.

Ezinye Indaba ZeStudio7...

XS
SM
MD
LG