Inhlanganiso elwela ilungelo lezisebenzi eye Zimbabwe Congress
of Trade Unions (ZCTU) ithi iyakwamukela ukulobelana phansi isivumelwano senkulumo okwenziwe ngabakhokheli bamacele womabili eMDC loMongameli Robert Mugabe laloba ilokhu ingamethembi uMongameli Thabo Mbeki wele South
Africa njengomlamulankunzi oqotho kudaba lweZimbabwe.
I ZCTU ithi kodwa sokungcoco ngoba sokuqheliswe iqula likaMbeki ukuze ligoqele amaqula eAfrican Union leUnited Nations. Linhlanganiso ithi laloba kunjalo, isola ukutshiywa phandle kwabenhlanganiso ezilwela ilungelo loluntu kunkulumo ezimqoka ezizayo.
Ithi lolugwalo kanye lazo inkulumo ngokwazo esezizalandela kumele ziveze izifiso zikazulu ngakhokhe. Yengeze yathi akumelanga kucatshangwe ngokufunwa ngamabandla ezombusazwe kuphela, ngoba udubo lweZimbabwe solundlondlobele okokuthi sokudingakala ukuthi lenhlanganiso ezizimeleyo ziphatheke emizameni yokululungisisa.
Abezokholo bona bathi basola kakhulu ukutshiywa kwabo kanye labenhlanganiso ezizimeleyo phandle kwalezinkulumo.
UMfundisi Promise Manceda, isiphathamandla
somanyano wezinkonzo, i Christian Alliance, utshele uSithandekile Mhlanga we Studio 7 ukuthi laloba kunjalo, balethemba lokuba inkulumo lezi zizaphumelela njengoba uMbeki sencediswa ngabeUnited Nations kanye labe SADC ukuzilawula.
