Ingcwethi kwezokulima lezokudla zithi zikhangelele inguquko masinyane kudaba lokwabelwa kokudla kuzulu obhekane lendlala emangalisayo elizweni lonke jikelele. Ingcwethi lezi zithi njalo zilethemba inkulumo eziqhutshwa ngamabandla ezombusazwe kweleSouth Africa zizaletha inguquko elizweni.
Isivumelwano phakathi kwamacele womabili eMDC lebandla leZanu PF esilotshelwane phansi ngoMvulo siqakathekisa ukuqedwa kwendlala elizweni. Uhulumende uvimbe inhlanganiso eziphathisa ngokudla ekuqhubeni umsebenzi wazo, ngaphambilini kokhetho lwe Run-Off.
Esinye isiphathamandla seWorld Vision esingathandanga ukubethwa ngegama sitshele iStudio 7 ukuthi inhlanganiso le, engenye yenhlanganiso ebeziphathisa uzulu ngokudla, ilokudla okunengi eziphaleni zayo njalo iphakathi kokukhulumisana laboSikomitshi bezigaba ezitshiyeneyo ama District Administrators (DA) icela imvumo yokuthi iqalise ukwabela abantu ukudla.
Kodwa oSikomotshi laba bathi labo abalamandla okuvumela
inhlanganiso lezi ukuthi ziqalise umsebenzi. Ingcwethi kwezokulima njalo elilunga ledale lePhalamande, emela iMangwe uMnu Edward Mkhosi utshele uBrenda Moyo weStudio 7 ukuthi kuyadanisa ukuthi abantu abanengi bayalamba khona kulenhlanganiso ezilokudla okubolela eziphaleni zazo.
Omela isigaba seBinga edaleni leSenate, uMnu Herbert Sinampande utshele uBrenda Moyo weStudio 7 njalo ukuthi ngempela uzulu uyalamba, esithi ulethemba lokuthi uhulumende uzavumela inhlanganiso ezizimeyo ukuthi ziqalise ukwabela uzulu ukudla ngokuphangisa.
Ezinye Indaba ZeStudio7....
