amalinks wokungena

Breaking News

Inkulumo Phakathi KweZanu PF LeMDC Sezimisiwe, Kungela kuvumelana


Inkulumo zokuxazulula umumo oseZimbabwe phakathi kukaMongameli Robert Mugabe labakhokheli bamacele womabili eMDC uMnu Morgan Tsvangirai loMnu Arthur Mutambara sezimisiwe.

Inkulumo lezi zimiswe izolo ngemva kokuba uTsvangirai ethe usake abuyele kubandla lakhe bayecebisana ngokuthize. Lokhu kuvezwe nguMongameli Thabo Mbeki weSouth Africa, onguye umlamulankunzi kudaba lweZimbabwe.

UMbeki utshele intathelizindaba eHarare lamuhla ukuthi inkulumo lezi zizaqhubeka ensukwini ezilandelayo nxa uTsvangirai sekhulume leziphathamandla zebandla lakhe.

UMbeki, yena oze eZimbabwe ngoMgqibelo, usuke lamuhla elubhekise kwele Angola ukuya chasisela uMongameli Jose Eduado dos Santos ongumkhokheli wogatsha lweSadc olubona ngezombusazwe kanye lomvikela ukuthi inkulumo sezikuliphi izinga.

UMongameli Mbeki wenza lokhu phambilini komhlangano weSadc oqala elizweni lakhe ngoLwesihlanu lapho azanikezwa yiZambia intambo zokuba ngumgcinisihlalo walumanyano.

UTsvangirai, uMutambara laye uMugabe ngokwakhe babikwa labo bezakubakhona emhlanganweni weSadc. Bobathathu basuka kusasa lamaqula abo belubhekise eSouth Africa lapho abazahlangana leziphathamandla zogatsha lweSadc troika, iqula linye ngalinye liveza isimo salo ngenkulumo.

NgoMqgibelo khona bazakwenza into efanayo njalo emhlanganweni omqoka weSadc. UMbeki ubikwa ekhangelele ukuthi inkokheli yeSadc icebise uTsvangirai ukuthi avume ukulobelana isivumelwano loMugabe loMutambara kubunjwe uhulumende omutsha.

UTsvangirai ubikwa engaphathwa kuhle yizibopho zokuthi anikwe isikhundla sokuba yinhloko kahulumende engela mandla jikelele. Izolo khona uTsvangirai ubesesithi ibandla lakhe lithi kalifuni uhulumende oloMugabe phakathi.

Kodwa ngemva kokuba uMugabe laye eqinise ikhanda esithi lokho ngeke kwenzeke, uTsvangirai ubikwa ecine sencibilika, kodwa wathi kusamele ayedinga ukucebisana labebandla lakhe andubana avume ukungena kuhulumende leZanu PF.

UTsvangirai ngokwakhe lamuhla wethule umbiko esithi ibandla lakhe lilokhu lizinikele kunkulumo njalo uthi udaba lweZimbabwe kumele lulungisiswe ngokuphangisa ngoba uzulu sethwele nzima.

UTsvangirai, yena otshone esenza imihlangano lenkokheli yenhlanganiso ezizimeleyo eyazisa ngenkulumo, uxwayise ukuthi inhlanganiso ezizimeleyo zivunyelwe ukuthi ziqhubeke ngomsebenzi wokwabela uzulu olambayo ukudla.

Uthi njalo ulethemba lokuthi umhlangano weSadc uzanceda ekuxazululeni inkinga yaseZimbabwe. Kodwa uthi isivumelwano esimele sibekhona ngesinanza intando kazulu ephume kukhetho lukaMbimbitho.

Ingcwethi ecubungula ezombusazwe uMnu George Mkhwanazi utshele uNtungamili Nkomo weStudio 7 ukuthi ukumiswa kwalezinkulumo kutshiya uzulu selahlekelwa lithemba.

Ngakwelinye icele uzulu weZimbabwe uthi ulokhu elethemba ekuthini inkulumo zizaphumelela laloba sezimisiwe ngokukavumelani.

Isakhamuzi seNkulumane edolobheni lakoBulawayo uMnu Richard Sibanda utshele uBrenda Moyo weStudio 7 ukuthi uMnu Tsvangirai kumele asebenzelane labanye abakunkulumo bavumelane kulungisiswe udaba lweZimbabwe.

Kodwa uNkosikazi Mavis Ndlovu, esinye njalo isakhamuzi sakoBulawayo uthi uMugabe kumele asuke esihlalweni avumele uTsvangirai abuse.

Kusenjalo, uMnu Arthur Mutambara ulandule imbiko yokuthi ulobelane isivumelwano loMugabe sokusebenza bonke kuhulumende omutsha laloba uTsvangirai engekho.

Iphephandaba likahulumende ele Herald libike ukuthi uMutambara ulobelane isivumelwano loMugabe izolo ngemva kokuba uTsvangirai ephume kulezi nkulumo ngokukhalala.

Kodwa, ekhuluma lentathelizindaba eHarare lamuhla, uMutambara ukulandule lokhu, laloba evumile ukuthi ibandla lakhe livumelana leleZanu PF phezu kohlelo lokwabelana amandla olusolwa nguTsvangirai, kubika intatheli yethi uThomas chiripasi obekulumhlangano.

Ezinye Indaba ZeStudio 7...

XS
SM
MD
LG