EleBotswana lithi uMongameli Ian Khama kasoke angene umhlangano wenkokeli zeSADC oqalisa eSouth Africa ngoMgqibelo. IBotswana ithi izathumela umphathintambo obona ngendaba zaphandle kwelizwe ukuze ayekuzwa ukuthi inkulumo zokumanyana eZimbabwe zihamba njani.
IBotswana iqinise isinqumo sayo sokuthi ayisoke ingene umhlangano weSDCc uma uMongameli Robert Mugabe enxusiwe.
Ihofisi ebona ngendaba ezenzakala phandle kwelizwe eziphathelene leBotswana, ikhiphe umbiko lamuhla isithi uMongameli Ian Khama Seretse Khama kasoke angene lu mhlangano.
Umphathintambo wokudlelana kweBotswana lamanye amazwe, uMnunzana Phandu Skelemani, nguye ozangena lumhlangano ukuze ayekuzwa ngenqubelaphambili yenkulumo zokudinga ukubumba uhulumende womanyano eZimbabwe.
Uhulumende weBotswana uthi ukungangeni lumhlangano kulandela isinqumo salelo lizwe sokunganaki umbuso kaMongameli Mugabe.
Umbiko okhitshwe lamuhla uthi eleBotswana liyaqinisa ukuthi alinanzi impumela yokhetho lokudinga umongameli olwesibili olwerun-off olwenziwe mhlaka 27 Nhlangula lonyaka.
IBotswana ithi indlela eqondileyo yokudinga uhulumende eZimbabwe ngokhetho isiyehlulekile yikho sokulenkulumo zokhumisana umlotha njalo kudingwa ukubunjwa uhulumende womanyano.
Uhulumende weBotswana uqhubeke esithi iZimbabwe akumelanga inxuswe emihlanganweni yeSADC ngoba ukwenzenjalo kulakho ukunika uhulumende kamongameli Mugabe isithunzi.
Ihofisi kaskelemani ithi amanye amazwe aweSADC lawo kumele ahloniphe izinqumo eziqondisa lenhlanganiso ngokuthatha amanyathela ngokwenzakala eZimbabwe.
IBotswana ithi amabandla aphakathi kwenkulumo zokudinga ukuthula ezimbabwe kumele aphathwe ngendlela efanayo kungela elinye eliphathwa ngezandla ezibuthakathaka.
NginguMartin Ngwenya owendaba zeStudio 7, ngiseGaborone kweleBotswana