Ibandla elibusayo kweleMelika elama Republicans likhangelelwe ukusungula umhlangano walo omkhulu weConventioin namhla, izigaba zeGulf Coast zibhekane lezulu likazamcolo uhurricane Gustav. Izulu leli lilakho ukuphazamisa umhlangano lo ngoba uMongameli George Bush lezinye iziphathamandla zakhe belakho ukwehluleka ukuya emhlanganweni lo owenzelwa e Excel Energy Center,St Paul eMinnesota.
UBush, umsekeli wakhe u Dick Cheyne, loSenator Joe Libberman bebekhangelelwe ukukhuluma ekuvulweni komhlangano lo kodwa baphatheke kakhulu ngomumo endaweni ezibhekane lezulu elinengi elikhangelelwe ukuna lokubhidliza ezigoqela iAustin le Texas. UBush wethekelela lezizigaba ebona ukuthi abantu bavikelekile yini engozini yalelizulu. UNkosikazi Laura Bush loNkosikazi Cindy McCain base Minnesota njalo uNkosikazi Bush engakhuluma emhlanganweni lo laloba besekuke kwaphuma imibiko yokuthi kaseyukukhuluma namhla.
Oncintisa kukhetho lukaMongameli kulelibandla uMnumzana John McCain uphakathi komkhankaso e Ohio le Pennsylvania. Ibandla lama Republicans libika ukuthi okuzakwenzakala emhlanganweni lo kuzakuya ngokuthi kuyini okwenzakalayo ngo Hurricane Gustav.
UBrenda Moyo WeStudio 7 uxoxe lengcwethi ecubungula ezombusazwe uDokotela Amkela Magaya ofundisa eGeorgian Court University e New Jersey. UMagaya uthi umhlangano wama Republicans uzaphanjaniswa kakhulu ngumumo wezomkhathi, esithi ukuphathwa kwabantu ngemva kuka hurricane Katrina ngomnyaka ka 2005 kwasolisa kakhulu umbuso kaMongameli Bush, ongafuni kube lempambaniso efanayo ku hurricane Gustav.
Ezinye Indaba ZeStudio7
