amalinks wokungena

Breaking News

UMugabe Sezamelela UMbeki ngoMvulo Andubana Akhethe Uhulumende


Laloba uMongamneli Mugabe exwayise izolo ukuthi ubezakhetha idale lakhe leCabinet lamuhla nxa iMDC iyabe ilokhu ingafuni ukuloba igama kugwalo lokwabelana amandla, kasakwenzanga lokhu.

UMugabe wethule amazwi la ngoba ubekhangelele ukuthi uMongameli Thabo Mbeki ubezakuza elizweni ngolweSine ukuzahlanganisa yena uMugabe ngokwakhe, uMnu Morgan Tsvangirai kanye loMnu Arthur Mutambara abakhokhela amacele womabili eMDC.

UMbeki ubikwa sezakuya eHarare ngoMvulo ukuyaletha ndawonye abathathu laba ukuthi bakhulumisane bavumelane phezu kodaba lokwabelana umbuso.

Ngakhoke uMugabe ubikwa sekhangelelwe ukumelela okuzaphuma ngemva kokuza kuka Mbeki.

Abamacele womabili eMDC bathi uMugabe engaqhubeka ngohlelo lwakhe lolu, uzakuba seyosele emasekweni. Inyathelo elizanywa nguMugabe leli lisolwa ngabanengi.

Isiphathamandla sikahulumende weMelika uMnu Robert Wood utshele intatheli izolo khonapha eMelika ukuthi impumela yenkulumo ezikhona kumele iveze intando kazulu.

Ngakwelinye icele, umsekeli kanobhala obona ngendaba zezwekazi leAfrica kuhulumende weMelika uNkosazana Jendayi Fraser utshele intatheli eSwaziland lamuhla, lapho ethekelela khona ukuthi kungaba lihlazo uMugabe engaqhubekela phambili ngohlelo lwakhe lolu.

Ingcwethi ecubungula ezombusazwe uMnu Rejoyce Ngwenya utshele uNtungamili Nkomo weStudio 7 ukuthi kaboni umhlangano kaMbeki wangoMvulo uthela izithelo ezikhangelelwe nguzulu.

Ezinye Indaba ZeStudio 7...

XS
SM
MD
LG