UMongameli Robert Mugabe ulobelane phansi isivumelwano labakhokheli bamacele womabili eMDC okusemthethweni lamuhla esokubumba uhulumende womanyano emkhosini omkhulu oqhutshelwe eHarare.
Umkhokheli weMDC-T uMnu Morgan Tsvangirai uba nguNhlokonkulu, Prime Minister phansi kwesivumelwano lesi, kuthi omunye wabasekeli bakhe ababili kuzakuba nguMnu Arthur Mutambara, umkhokheli welinye icele leMDC.
Phansi kohulumende omutsha lo, ibandla le MDC limanyana
leleZanu PF ekukhuthazeni amazwe afana leBhilithani kanye leMelika ukuthi esule
izijeziso azethulela uhulumende kaMongameli Mugabe.
Ibandla leMDC selimanyene njalo leleZanu PF ekuthini uhulumende weBhilithani kumele abe nguye ohlawula abalimi abamhlophe abalahlekelwa ngamaphulazi phansi kohlelo lukahulumende olokwaba kutsha umhlabathi lona olutshiye abelungu abanengi belahlekelwe ngamapulazi abo.
Phansi kwesivumelwano lesi, uMugabe nguye ozakhetha okusemthethweni uMnu Tsvangirai ukuthi abe yinhloko kahulumende kusaguqulwa isisekelo sombuso phansi kuka Ammendment Number 19. Amalunga eSenate azakwengezelelwa esuka ku 93 esiya ku 102.
Amabandla womathathu alelungelo lokukhetha amalunga amathathu ngabandla ukungena kuSenate.
Isiphathamandla
seMDC-T uMnu Sam Sipepa Nkomo utshele uNtungamili Nkomo weStudio 7 ukuthi uTsvangirai uzagcotshwa okusemthethweni iviki ingakapheli.
Sixhume njalo umsekeli wesikhulumi seMDC-M uMnu Renson Gasela yena othi ukuze udubo olukhona lulungisiswe kumele inkokheli yamabandla womathathu isebenze ibambene.
Kusenjalo, ingcwethi ecubungula ezombusazwe uMnu George Mkhwanazi uthi okwamanje kunzima ukutsho ukuthi inkokheli yeZanu PF izasebenzelana kuhle leyeMDC, esithi isivumelwano lesi sikhanya sixega.
