Ibhanga elikhulu lelizwe Reserve Bank of Zimbabwe selengezelele inani lemali uzulu asesenelisa ukuyithatha emabhanga ngelanga isuka ku $1000 isiya ku $20.000 kusukisela ngoMvulo. Usibalukhulu weRBZ uMnumzana Gideon Gono wazise lokhu izolo emkhosini wokunikeza abamabhizimisi amaLicence okuthengisa impahla ngemali yakwamanye amazwe.
Ukwengezwa kwenani lemali le kulandela isicelo senhlanganiso yezisebenzi eye Zimbabwe Congress of Trade Unions sokuthi uzulu avunyelwe ukuthatha imali ayifunayo emabhanga. IZCTU ibithe nxa lokhu kungenzakalanga izathatha amanyathelo mhlaka 1 October.
Ukuze sizwe ukuthi iZCTU yemukele njani ukwengezelelwa kwemali uzulu asesenelisa ukuyithatha emabhanga, uBrenda Moyo weStudio 7 ukhulume lomsekeli kanobhala jikelele walinhlanganiso uMnumzana Japhet Moyo. UMoyo uthi iGeneral Council yabo izakuba lomhlangano kusasa ihlaziya loludaba.
