UMongameli Mugabe uhlangane lomkhokheli welinye lamacele eMDC uMnu Morgan Tsvangirai lamuhla eHarare bekhulumisana phezu kodaba lokwabelana izikhundla zedale lephalamende, i cabinet behluleka ukuvumelana.
Lokhu kwenzakala laloba uMugabe ekulandule izolo ukuthi kulokudonselana phezu kodaba lwezikhundla lolu, esithi njalo uhulumende omutsha uzabunjwa iviki le ingakapheli.
UMnu Arthur Mutambara, umkhokheli wecele leMDC lesibili, yena ubengekho kulumhlangano ngoba ebikwa engaphandle kwelizwe.
Isikhulumeli seMDC kaTsvangirai uMnu Nelson Chamisa utshele iStudio 7 ukuthi behluleke ukuvumelana loMugabe ngoba efuna izikhundla zonke ezimqoka ziye kubandla lakhe eleZanu PF.
Ingatsha ezihluphayo zigoqela olweFinance, Home Affairs, Local Government kanye lolwe Defence.
Imbiko esiyamukeleyo ithi udaba lolu lungaba solubuyiselwe njalo kuMnu Thabo Mbeki, yena ongumklamulankunzi kudaba lweZimbabwe.
Ingcwethi ecubungula ezombusazwe uMnu Mlamuli Nkomo utshele uNtungamili Nkomo weStudio 7 ukuthi ukungavumelani phezu kwezikhundla lokhu kuyadanisa ngoba kusitso ukuthi udubo olukhona elizweni luqhubekela phambili.
