UMongameli Mugabe ubikwa elobele incwadi inkokheli yamacele womabili eMDC ukuthi imuphe amagama alabo abazaphiwa izikhundla zeCabinet. Lokhu kulandela imbiko kaMugabe yokuthi uzalandela izinqumo zomanyano weSADC wokuthi kubunjwe uhulumende womanyano ngokuphangisa.
Lanxa icele elikhokhelwa nguMnu. Arthur Mutambara lisithi liyavumelana lesinqumo seSADC lelibandla lithi kalisoze lingene kuhulumende ongela elinye icele elikhokhelwa nguMnu. Tsvangirai. Isinqumo seSADC sithi sona kumele iZanu PF lecele leMDC elikhokhelwa nguMnu. Tsvangirai azophisane ukukhokhela isikhundla sehome affairs kodwa uTsvangirai uthi kavumelani lalokhu.
Ngenyanga edluleyo uMomgameli Mugabe wabe izikhundla wazipha ezigoqela esomvikela, iDefence, esomthetho-Justice, wasesipha amacele womabili eMDC izikhundla esezibhidlizwe yikonakala komnotho welizwe ezifana lesokulima lempilakahle. Ingcwethi ecubungula ezombusazwe, uMnu. Qhubani Moyo, utshele uChris Gande weStudio 7 ukuthi umbango wezikhundla lo usutshiye uzulu esebunzimeni obesabekayo.
