Amalunga enhlanganiso ebizwa ngokuthi "The Elders" agoqela owayengunobhala jikelele wenhlanganiso ye United Nations uMnumzana Kofi Annan, owayenguMongameli weMelika uMnumzana Jimmy Carter loNkosikazi Graca Machel, athi azaqhubeka ngohambo lwawo lokuya eZimbabwe, laloba uhulumende weZimbabwe esithi abake bamise loluhambo.
Iphephandaba leHerald libike ukuthi amalunga e The Elders la aza elizweni elenjongo yokufuna ukungenela kwezombusazwe, kodwa inhlangansio le ithi izokhangela umumo wokudubeka kukazulu, indlala, ukusilela kwenhlanyelo, amafertiliser lokubhidlika kwezempilakahle.
Linhlanganiso eyabunjwa ngowayengumongameli weSouth Africa uMnumzana Nelson Mandela, yethule umbiko namhla wokuthi uhambo luyaqhubeka, njalo isiqoqe imihlangano lenhlanganiso ezizimeleyo ezimbalwa ukuze izwisise ngesimo esikhona elizweni.
UBrenda Moyo weStudio 7 ukhulume lomeli weZimbabwe kunhlanganiso yeUnited Nations, uMnumzana Bonface Chidyausiku othi inhlanganiso ye The elders kumele idinge ukuthi amazwe afana leMelika leBhilithane esule izijeziso zenotho ezafakelwa uMongameli Robert Mugabe leziphathamandla zikahulumende wakhe.
