Umkhokheli webandla leMDC uMnu Morgan Tsvangirai ukhangelelwe ukuhlangana leziphathamandla zenhlanganiso yabahlonitshwa emhlabeni jikelele eye “The Elders” lamuhla kweleSouth Africa.
Iziphathamandla lezi zibalisa
owake waba ngunobhala jikelele weUnited Nations uMnu Kofi Annan, owake waba
nguMongameli weMelika uMnu Jimmy Carter kanye loNkosikazi Graca Machel.
Abathathu laba balubhekise kwele Zimbabwe ukuyahlaziya umumo okhona, ikakhulu udubo lwendlala. Uhulumende usola uhambo lwabathathu laba esithi ngabantu abaziwayo ngokuzonda uMongameli Robert Mugabe.
Ngalokhu uhulumende uthi bengaba besiza ngenjongo engalunganga. UTsvangirai ngokwakhe ufika eSouth Africa lamuhla evela eBerlin, kwele Germany.
Ekhuluma eseGermany izolo uMnu Tsvangirai uxwayise ukuthi umumo ungama manzonzo konakale into ezinengi eZimbabwe elizweni nxa uhulumende womanyano engabunjwanya kunyanga ezimbili ezilandelayo.
Sibuze ingcwethi ecubungula ezombusazwe uMnu Rejoice Ngwenya ukuthi njengoba uhulumende sevele wasola uhambo luka Annan labanye bakhe, ukuhlangana loTsvangirai kakusoze kwengezelele na ukufuthelana phakathi kwaleli qula lohulumende kaMugabe?
Ekhuluma loNtungamili Nkomo weStudio 7, uNgwenya uthe akumelanga kube ngumlandu kahulumende ukuthi abathathu laba bahlangane loTsvangirai, esithi uhulumende kumele azihluphe ngendaba eziqakathekileyo ezifana lokulwisana lomkhuhlane weCholera, hatshi ukuhlangana kukaTsvangirai lequla lika Annan.
