Iqula lenhlanganiso yezihlonitshwa ethiwa 'group of elders' ebelifuna ukwethekelela iZimbabwe ngenhloso yokuzibonela indingeko zikazulu makhaza lincitshiwe imvumo yokungena elizweni nguhulumende weZimbabwe.
Obekhokhela leliqula uMnumnzana Kofi Annan owaye ngunobhala wenhlanganiso yomanyano wezizwe zomhlaba utshele intathelizindaba eSouth Africa ukuthi kulusizi ukuthi benqatshelwe ukusiza abantu beZimbabwe.
UBenedict Nhlaphousipha loludaba eseJohannesburg kwele South Africa.
Owayemela iZimbabwe kweleChina njalo elilunga lezokuqutshwa kwembiko kubandla leZanu PF, umnu. Chris Mutsvangwa utshele iStudio 7 ukuthi uhulumende kalani loMnu. Carter kunye lonkosikazi Machel kodwa abangamfuniyo elizweni nguMnu Anan ngoba ephikisana lohulumende. UMnu. Mutsvangwa uthi iqula leli abalifuni elizweni ngoba ilizwe liphakathi kokulungisela ukulima njalo lenkulumo zokubumba uhulumende womanyano.
Kunjalo nje, ingcwethi ehlaziya ezombusazwe uMnu Mandlenkosi Gatsheni uthi uhulumende kaMongameli Mugabe uphambanise kakhulu ngokuvimba iqula likaMnu Annan ukungena eZimbabwe.
