amalinks wokungena

Breaking News

Inkulumo Zokuxazulula Inkinga YeZimbabwe Ziyaqala Njalo


Inkulumo zokulungisisa umumo oseZimbabwe seziqalisile njalo kwele South Africa, phakathi kwamacele womabili eMDC leZanu PF. Lezi nkulumo zenzelwa eSandton eJohannesburg kwele South Africa zikhokhelwa nguMnu Thabo Mbeki ongmlamula nkunzi kulezi nkulumo.

Abazi ngokwenzakala kulezi nkulumo bathi kaziqalisanga kuhle ngoba kulokuthi amaqula amabandla womathathu ahlaziye inguquko kusisekelo sombuso esika Ammendement # 19, abecele leMDC elikhokhelwa nguMnu Morgan Tsvangirai babikwa bebe sebefuna ukuthi uMbeki angabi nguye okhokhela lezi nkulumo. AbeMDC laba bathi njalo bona kabasamfuni vele umbeki kulezi nkulumo ngoba esekela izanu pf kukho konke okuyabe kudonselanwa.

Lokhu kulandela okunqunywe lidale leNational Council yeMDC elale ukwamukela isinqumo sokuthi kube labampathintambo ababili abazakhokhela ugatsha lwendaba zaphakathi kwelizwe. Leli cele lale njalo ukuthi lezi nkulumo zigxhile kuAmmendment # 19 kuphela kungalungiswanga ezinye indaba ezihluphayo. Kodwa elinye icele elikhokhelwa nguMnu Arthur Mutambara libikwa lona lisithi laloba lingavumelani lezinye izibopho zeSADC lizimisele ukulandela isinqumo sokuthi kuhlaziywe uAmmendement # 19.

Kunjalo nje, isiphathamandla secele leMDC elikhokhelwa nguMnu. Morgan Tsvangirai, uMnu. Sam Sipepa Nkomo utshele uChris Gande weStudio 7 ukuthi kabasoze bavumele ukuthi bangene kuhulumende womanyano nxa izikhalazo zabo zingasuthisekanga.

UNkomo uthi lanxa uzulu ephakathi kobunzima obungalungiswa nguhulumende womanyano kabasoze baphange bange kuluhulumende ngoba kungabakhathaza kusasa.

Ingcwethi kwezombusazwe, umnu. Dumisa Matshazi, utshele uChris Gande weStudio 7 ukuthi icele leMDC elikhokhelwa nguMnu. Tsvangirai lenza kuhle ukuthi lingangeni kuhulumende lo ngoba lingaginywa njengalokhu okwenziwa IPF Zapu.


Ezinye izindab zeStudio7…


XS
SM
MD
LG