Umqondisi wenhlanganiso ekhankasela ukuthula lokulwela ilungelo loluntu, eyeZimbabwe Peace Project (ZPP), uNkosazana Jestina Mukoko ubikwa ethunjwe ngabantu ekade behlome ngenkafula kufa ekuseni emzini wakhe enorton duzane leHarare ngolweSithathu. I ZPP ithi uNkosazana Mukoko uthunjwe ngamadoda alitshumi lambili emadabukakusa ahamba laye elokhu egqoke impahla zokulala.
Akwaziwa ukuthi abathumbi bakaMukoko bamuse ngaphi. Inhlanganiso yakhe ithi yesabela ukuthi impilo yakhe ingaba sengozini lapho akhona. Ngakwelinye icele inhlanganiso ekhankasela ukulondolozwa kwelungelo loluntu emhlabeni jikelele eye Amnesty International yethule umbiko isola ukuthunjwa kukaMukoko, isithi kumele akhululwe ngokuphangisa.
Laloba kungaziwa ukuthi abathumbi
bakaMukoko ngobani, kucatshangelwa ukuthi ngabasekeli beZANU PF lensoli
zikahulumende.
Inhlanganiso kaMukoko ngeyinye yenhlanganiso eziqoqa lokuloba phansi izehlakalo zobudlwangudlwangu lokubulawa kukazulu makhaza labasekeli beMDC ngabeZANU PF. Ukuthunjwa kuka Mukoko, umuntu odume kangaka eZimbabwe endabeni eziphathelane lokulondolozwa kwelungelo loluntu kuveza sobala ukuthi uhulumende kaMongameli Robert Mugabe useqalisile njalo seqinisa umkhankaso wakhe wobudlwangudlwanu lokuhlukuluza labo abalembono ehlukene leyake.
Inhlanganiso ezinengi ezilwela ilungelo loluntu ezibalisa oHuman Rights Forum, Zimbabwe Lawyer for Human Rights, Zimra, Freedom House lezinye ezinengi zikhuthaza uhulumende ukuthi akhulule uMukoko ngokuphangisa.
Abe nhlanganiso yamagqwetha bathi bazamile ukumdinga uMukoko ezinkambeni zamapholisa elizweni jikelele kodwa bamswele njalo amapholisa abe phika ukuthi bambophile ngakhoke angeke atholakala ezinkambeni zamapholisa.
Ongaba lolwazi lwalapho angatholakala khona uyacelwa ukuthi azise inhlanganiso yeZimbabwe Lawyers for Human Rights kumbe ulwazi olungakhokhekhelela nje ukuthi atholakale.
Ezinye Indaba ngesiNdebele...
