Amapholisa atshaye abantu kade besendwendweni zamabhanga bedinga imali zabo lamuhla edolobheni leHarare. Lokhu kwenzakale ngemva kokuba amabhanga engezelele imali engathathwa ngelanga isuka ku $500 000 ngelanga isiya ku$100 million ngeviki.
Bekuphithizela emabhanga kulandela ukukhwezwa kwemali engathathwa ebhanga lokhu okubangele ukuthi abanye abantu balale emisamo yamabhanga belindele ukuthi engavulwa bathole ithuba lokuthatha imali yabo. Lamuhla imali ebambeneyo eye $100 million $50 million le $20 million iqale ukusebenza. Kodwa inengi liphindele emakhaya lilengise izandla ngoba ibingatholakali lula limali.
Ezinye izitolo kobulawayo laseharare zibikwa zivuke zivaliwe kwathi ngokuya kwesikhathi zavula intengo isisidla ubhedu. Kuthi ngakwelinye icele intengo yemali yakwamanye amazwe layo ihle yakhwela okumangalisayo. Njengesibonelo i 100 Rands ye South Africa ibithengwa nge $30 million ekuseni kodwa kusiyafika emini ibisithengwa nge $100 million. Kuthi intengo yezinto yona ikhwele okwesabekayo. Kwelinye ibhutsha inyama eyisisndo se one kilogram ibithengwa nge$7 million kodwa ntambama ibisithengwa nge $20 million.
Kunjalo nje, inhlanganiso yezisebenzi, iZCTU ithi ihlangene losibalukhulu webhanga lesizwe, irReserve, uMnu. Gideon Gono. Lanxa umsekeli kanobhala jikelele wezctu uMn. Japhet Moyo engavezanga okunengi ngalomhlangano esithi bavumelene logono ukuthi nguye ozethula abakuvumeleneyo inzwabethi zitshele iStudio 7 ukuthi uGono uvumile ukuthi asuse imigoqo enqbela uzulu ukuthatha imali ayifunayo emabhanga ngenyanga ezayo. UMoyo utshele uChris Gande weStudio 7 ukuthi lanxa besuthiseke ngabakuvumelenyo bamelele ukubona ukuthi kuzalandelwa nguhulumende na.
