Obesebenzela ehofisini kaMnumzana Morgan Tsvangirai okweminyaka ethize uMnumzana Ghandi Mudzingwa uthunjwe ngabantu abaziveze njengamapholisa abayisitshiyagalolunye abakade behamba ngemota eziyisithupha ngoMvulo emini yantambama ethekelele isihlobo sakhe emzini weMasasa eHarare. Abathumbe uMudzingwa kuthiwa bebehlome ngemibhobho. Lokhu kwaziswe lugatsha olubona ngokwethulwa kwemibiko kucele leMDC elikhokhelwa ngu Tsvangirai.
Kusenjalo iMDC isikhweze isicelo enhlanganisweni ze SADC leAfrican Union ukuthi zithathe amanyathelo okulondoloza impilo zabantu beZimbabwe lokuvikela udlakela elizweni. UBrenda Moyo weStudio7 ukhulume lomsekeli wesikhulumi salelibandla uNkosazana Thabitha Khumalo othi ukuthunjwa kwamalunga ebandla lakhe sokukhomba ukubhidlika kukahulumende womanyano, phakathi kwebandla lakhe leZANU PF.
Kunjalo nje umthethwandaba weHigh Court namhlanje unqume ukuthi usikomitshi wamapholisa u Augustine Chihuri kumele ancedisane lamagqwetha amela uNkosazana Jestina Mukoko ukumdinga enkambeni zonke zamapholisa, lezebutho.
IHigh Court inqume njalo ukuthi okufanayo kumele kwenzakale ekudingeni izisebenzi ezimbili ze Zimbabwe Peace Project, ezithunjwe ngoMvulo lazo ziphange zivezwe ukuthi zingaphi. Izisebenzi lezi nguMnumzana Pascal Gonzo loMnumzana Broderick Takawira. UNkosazana Mukoko umqondisi we ZPP uthunjwe ngeviki edluleyo.
UBrenda Moyo uphinde wakhuluma lentathelizindaba yestudio7 uThomas Chiripasi osethulele okunqunywe ngumthethwandaba ngolweSibili.
Ezinye Indaba ZeStudio7...
